Ta conoci cu na Aruba tin cantidad di cacho y pushi riba caya. Mercedes de Bruyn di United Dogs Aruba a lidera e proyecto di accion pa sterilisa e bestianan aki, pa asina nan stop di reproduci y di e forma aki alivia e problema.

For di ayera te cu dia 21 di september, e proyecto lo tuma luga. De Bruyn ta splica cu idea di e programa pa purba sterilisa tur cacho of pushi di Aruba cu no ta sterilisa, cu ta biba riba caya of nan tin doño pero toch ta mas na caya cu den cura, asina evita reproduccion.

Actualmente den e clinica tin 110 bestia, di cual 40 ta pushi y e resto cacho; sinembargo nan meta ta pa sterilisa 400 bestia. E ta bisa cu na Aruba, e problema aki ta uno grandi pasobra un cacho femenino por trece den 6 aña miles di puppies. Den caso di pushi, e ta trece mas ‘e ta un problema grandi tambe na otro isla’.

Manera cu e proceso di sterilisacion caba, nan lo tene e cachonan te ora cu veterinario por wak cu nan por come, bebe y defende nan mes bek. E ora ey nan ta haya aprobacion pa despues hiba e bestianan na e localidad unda a haya nan.

De Bruyn ta splica cu algun tabata riba caya, sinembargo, algun di nan tin doño caba y p’esey nan mester ta cauteloso pa tin tur e bestianan organisa. “Nos tin instancianan concerni cu cuido di cacho y pushi anto asina ta traha hunto pa haci e miho trabou. Tambe nan tin specialista den bestia cu ta cooperando.”

Tur instancia cu boluntario ta trece e animal na unda e sterilisacion lo tuma luga. Prome nan ta registra cada un di nan. Dunando nan bon cuido, ta haci un pre- operacion, despues ta bay haci e operacion. Despues di esey nan ta wordo bon cuida te ora nan mester bay bek na nan destinacion.

De Bruyn ta expresa cu ta contento cu tur diferente departamento cu a yuda, sea den area di medicina, electricidad y awa pa por a haya e luga adecua pa atende cu tur bestia, pa asina logra sterilisa.

Un mensahe cu De Bruyn ta bisa na cada persona cu tin un cacho of pushi, ta pa nan no laga e animal riba caya, pasobra e ta un peliger. Mantene e cacho den bo cura, pasobra manera cu nan sali, tin otro cacho cu por abusa di un hembra anto asina ta crea mas cacho riba caya.

Tambe e ta pidi pa persona duna nan un miho cuido. “Na Aruba tin hende cu ta stima bestia, pero toch ta wak riba caya hopi. E por ta cu necesidad di no tin placa suficiente pa cuida nan. Tambe por mira cu esunnan den necesidad ta yuda e bestianan aki. Pa e motibo aki ta importante pa sterilisa nan, pa asina evita cu tin mas cacho of pushi riba caya.”