Trahadonan di proyecto Traimerdia a bay den accion ayera pa motibo di asunto di promocion  y landsbesluit cu gobierno no a regla ainda.  

E ultimo echo cu a pone e trahadonan di e proyecto Traimerdia disgusta ta, cu nan a wordo informa cu nan solicitud a wordo poni un banda pasobra nan ta trahando riba e ‘functiebeschrijving’ di e maestronan. Asina Bon Dia Aruba a compronde for di nan. Ta asina cu for di 2014  un grupo di trahado a bin haci varios opleiding; pero ainda nan no a haya nan respectivo promocion pa cada estudio cu nan a haya. Nan a caba practicamente tres curso y te cu awe nan no a haya nada.

Claudia Martina y Helen Dirkzs kende ta shop steward di SEPPA cu ta representa e trahadonan a declara na Bon Dia Aruba cu nan a dicidi di bin cu e accion di protesta aki, ya cu e asuntonan aki ta tardando hopi sin cu nan por haya un contesta positivo ainda. Nan tabata determina di no move for di dilanti di oficina di Traimerdia situa den edificio di ex Codemsa, si nan demanda no ta haya atencion. Nan tabata kier  un contesta riba ki dia e dos asuntonan di promocion y landsbeluit lo bin cla. Nan a yega di manda carta y “hopi biaha nos ta cana bin puntra”, asina Helen Dirkzs ta bisa.

Traimerdia no ta un fundacion sino cu nan ta cay bou DPS (Dienst Publieke Scholen) cu ta un instancia di gobierno.  Nan ta alrededor di 30 trahado, entre nan esunnan cu a haci opleiding, pero tambe un otro grupo cu algun di nan a dicidi di join cu nan pa atende su asunto pendiente di landsbesluit.  P’esey pa nan no ta aceptabel cu mientras ta wordo duna prioridad na e functiebeschrijving di e maestronan, e asuntonan pendiente di e trahadonan di Traimerdia ta wordo poni un banda.

 

Incertidumbre
Ayera mainta tabatin un gran incertidumbre riba con lo para cu e muchanan cu ta bay Traimerdia.  Aunke e grupo di  trahado aki cu ta afilia na sindicato SEPPA ta mustra un grupo chikito,  nan impacto ta grandi. Ya cu nan ta traha  cu casi 9 centro di Traimerdia rond di Aruba dunando atencion y ayudo na un cantidad di 1000 mucha, na momento cu nan ta caba scol traimerdia. Nan ta muchanan cu nan ta wordo yuda cu nan huiswerk, tanten e mayornan ta traha.

E trahadonan tabata na spera di un contesta positivo pa bay traha. E accion aki a dura te oranan di mainta y despues nan a bay traha.  Representantenan di e trahadonan a expresa cu e muchanan ta central. “Nos ta stima nos muchanan, nos no kier perhudica nan. Pero a nos tampoco por sali esun perhudica”, segun Claudia Martina.

P’esey nan a opta pa bin  cu nan accion ayera mainta tempran ora cu nan no ta trahando. E trahadonan tabata flexibel y habri pa haya un solucion na  nan situacion, asina a indica.  E proceso aki por tuma su tempo pero locual nan tabata kier ta un compromiso formal riba un fecha specifico cu nan asuntonan pendiente ta keda cla.

Pero e situacion ta keda uno di incertidumbre, ya cu si nan solicitud no ta wordo atendi debidamente nan lo evalua cu nan sindicato pa wak kico lo ta e siguiente paso. “Nos no ta bisa tur loke ta bay sosode pasobra nos tin cu sinta ainda cu nos sindicato  y warda pa palabra un cu otro”, sra. Martina ta conclui.