Na aña 1995 tabatin un conferencia importante, cu huesped internacional, yama Aruba Economic Summit, iniciativa di e ministro encarga cu asunto economico di e tempo ey. Den e evento a bin dilanti e escogencia cu Aruba lo mester haci, cla y raspa, pa haci tur lo posible pa mantene un base solido pa turismo, pa motibonan obvio.

Durante e conferencia ey a bin dilanti tambe e problema di e cobamento di santo y piedra, cu no tabata, y no ta cuadra awor tampoco, cu un maneho y strategia basa riba desaroyo sostenible. Simplemente bisa, laga tur hende coba na nan antoho, destruyendo e paisahe costoso pa eternidad, no por cuadra cu un vision di sostenibilidad. E discusion e tempo ey a desvia den direccion di placa grandi supuestamente paga pa empresanan di e sector, pa no mishi cu nan interes. Esaki a haci cu no a papia di un politica, den cual ta stimula y yuda e companianan cu ta coba material den mineria abierto, pa nan cambia pa importacion di e material cu Aruba mester, y gana nan placa cu esey. Es decir, no ta asina cu e companianan mester desaparece, pasobra construccion, manera na tur pais tambe na Aruba lo sigui semper y mester material pa esaki.

E tempo ey caba, tabata conoci cu di tur manera Aruba lo no por a continua cu coba e material ey, a menos cu un hende lo kier bay asina leu di destrui henter e paisahe unda no tin cas, edificio o caminda. Esey anto ta implica cu tardi o tempran, nos lo a yega na e punto cu mester scoge pa para mineria na Aruba y cuminsa cu importacion di material.

Lastima cu nos no por a yega e tempo ey caba na e conclusion cu awe si ta bin dilanti. Den e caso di dos compania na Sero Cristal nos por a comprende di un comunicado di prensa di gobierno, cu nan no por coba mas na e sitio, pero ta trasladando nan operacion pa Barcadera, pa dedica nan mes na importacion di material. Un bon comienso, cu sin embargo tin su ‘pero…’ Den e caso particular aki ta trata di compania cu ta cobando den un area cu ta destina como ‘natuurgebied’. Unda pues nan no tin nigun derecho di destrui e tereno aki y por lo tanto nunca lo por a haya un ‘hindervergunning’ pa nan haci loke nan a haci. Lastima cu asina mes a costa añas di accion di e vecindario pa yega na un paro di e inhusticia aki. Pregunta cu a keda, ta riba palabra di ken nan por a dal bay tur e tempo ey anto? Mester tabatin un autoridad cu a bisa nan cu nan por wel di sigui cu nan operacion?

Tambe ta keda ademas e caso di otro proyecto di cobamento, di cual nos no sa si eseynan tambe lo termina. E punto ta keda, cu si no ta bin un regla general pa prohibi cobamento completamente, nos no ta bay salba asina hopi di nos paisahe, ya cu varios ta riba tereno priva. E solucion den e caso particular aki a bin pa motibo di e accion persistente cu e bisiñanan a tuma, pa cual nan merece un aprecio di henter comunidad. Loke nan ta logra rescata aki no ta solamente pa nan beneficio, pero pa e generacionnan despues di nos cu tambe mester por gosa di un paisahe natural den su estado original. Nos no sa na e momento aki kico ta e maneho general, pero ta kere cu ta importante pa yega na esey mas pronto posible, pasobra cu e mas di 50 yaganan grandi den cara di Aruba nos ta kere cu ta suficiente destruccion.

Y papiando di tur e buraconan grandi ey, plama riba henter nos teritorio, ta oportuno pa papia tambe di e mal uso cu ta dunando na e sitionan aki como dump, mas tanto ilegal, pero no ta importa tanto si nan ta ilegal o no, pasobra aparentemente di tur manera no tin control riba nan. Mientras cu nos ta yegando poco poco na un maneho mas controla pa loke ta e desperdicio recolecta, ainda ta keda e pregunta si tin suficiente control riba e lugarnan unda ciudadano individual y cierto empresarionan por deshaci di nan desperdicio sin hiba esaki na unda e mester ta, obviamente pa scapa placa.

Otro aspecto cu ta bin dilanti den e asunto aki, ta e proteccion di e areanan pafo di Parke Nacional Arikok. No ta pasobra nos tin un parke nacional cu ta hogar pa un bon parti di nos rikesanan natural, nos por dal bay y ruina tur cos pafo di e parke. Nos tin hopi naturalesa cu mester di proteccion debido den e otro partinan di nos isla, y ta describi tambe den e ROP vigente y esun nobo cu ta den proceso. E punto mas importante, despues di tin un plan aproba den cual e areanan di naturalesa ta describi, ta pa cumpli cu algo cu semper nos ta fayando aden, y esey ta e debido control riba uso di e areanan aki. Esey ta loke e caso di Sero Cristal a ilustra claramente.

LJMADURO – 05-MAR-2019