Mediante un comunicado pa prensa, Cuerpo di Polis a informa cu tabata den oranan di mainta Polis ta bin encontra bultonan di droga na costa pariba di Aruba.
Tabata na altura di e sitio cu yama “Rincon” na unda a bin encontra 12 bulto di droga como tambe 6 vest di salba bida.
Despues ta bin encontra tres homber indocumenta cu probablemente ta di nacionalidad Venezolano. Tur tres persona a keda deteni na e sitio. E caso aki ta den pleno desaroyo. Diferente teamnan di Polis ta na e sitio conhuntamente cu e sosten di Kustwacht y Douane.
Altocomisario di Polis, drs. Ramon Arnhem tambe a bay na e sitio pa mira e situacion y ta felicita e polisnan pa e bon trabou y esfuerso haci pa combati criminalidad.
Departamento di Unidad di Crimen Organisa tin e investigacion aki. Si tin algun informacion y kier keda anonimo por yama e tipline di polis na 11141.
Den dianan aki, Costa di Aruba a bira mas activo pa loke ta trata entrada di forma ilegal di boto y persona indocumenta na unda autoridadnan ta bin trahando incansablemente pa por mantene e frontera di Aruba mas sigur posibel.
