Accion lo por termina den corte; Gobierno no ta bay tolera tipo di accion sin base

Minister Presidente, Evelyn Wever-Croes a cualifica como ‘iresponsabel’ e accion cu Sindicato di Polis Aruba (SPA) a realisa diadomingo. Tambe el a lamenta e accion cu Sindicato di Maestro di Aruba (SIMAR) a realisa ayera. E mandatario a pidi ambos sindicato pa pone nan energia hunto pa purba scapa nos pais di e crisis cu nos ta aden.

Premier Wever-Croes su opinion riba e accion di SPA diadomingo y di SIMAR ayera mainta, ta cu nan ta accionnan uno sin busca informacion debido y dos, sin necesidad. E no ta haya hustifica un accion aworaki. E no ta descarta e posibilidad cu gobierno por bin cu caso sumario pa para accion cu e ta considera sin base of cu no ta hustifica.

E ta haya cu e lider sindical no ta yegando cu e informacion corecto cerca di nan miembronan. P’esey el a bay amplio rond di e tema aki. El a bisa cu gobierno den futuro no ta bay tolera e tipo di accion aki.

E mandatario a agrega cu ora gobierno por mira cu e tipo di accion aki por causa daño, nan tin e posibilidad di pidi un caso sumario na corte. Principalmente durante un weekend caminda e ta haya cu SPA su accion a pone orden publico na riesgo. Nan tabata den un dilema riba e decision aki, si bay corte of no. Pero e biaha aki nan a dicidi pa laga e accion aki pasa, sin mester bay corte. Pero el a bisa claramente cu gobierno no ta bay tolera cu tur weekend nos tin e tipo di accion aki.

E intencion di no bin cu un caso sumario ta debi cu gobierno kier a sinta un biaha mas cu sindicatonan, y splica nan e motibo di nan decision. Pa asina nan por informa nan miembronan debidamente. Accion cu a surgi den fin di siman a haci cu un reunion programa pa diaranson awor a wordo hala pa ayera mes.

E no sa si tin mas accion na caminda. Pero el a declara cu SIMAR su accion ayera tabata un sorpresa pe, ya cu nan tabata den combersacion. Independiente cu SIMAR por a haci algun anuncio di accion prome, e mandatario a bisa cu personalmente e no tabata na haltura di e accion aki.

Sinembargo ayera minister di Enseñansa, Armando ‘Rudy’ Lampe mes a yama un reunion cu SIMAR tocante enseñansa en general. Tambe tabatin otro reunion cu nan a plania riba asunto di pension y cortamento di salario, etc. E reunion aki tabata esun plania pa diaranson. Pero nan a dicidi di hal’e pa ayera mes den e mesun reunion di enseñansa cu minister Lampe pa trece mas trankilidad.