Mayornan y otro famia di baby Lunah di 2 luna cu ta den hospital den condicion critico, a cuminsa un accion riba Facebook pa haya contribucion financiero y asina paga e tratamento necesario pe baby.
Segun e mayornan, dokternan local y AZV no ta haci suficiente pa duna Lunah e cuido cu e mester, entre otro pa motibo cu el a nace cu un malesa grave. “Nan no kier haci todo pa todo”, asina e mama Laindha Garcia ta bisa. E malesa ta yama Trisomy 18 of Edwards Syndrome. E ta un deficienca den su chromosoom y su expectativa di bida ta minimal. Pero segun e mayornan tin tratamento y casonan awor cu por biba mas largo.
Desde 19 di januari Lunah ta den hospital bek pa motibo di complicacion cu su stoma. Segun su mayornan un operacion por alivia su situacion lihe, pero dokternan no kier aproba e operacion y ta dunando un tratamento alternativo. Segun e mayornan ta pa motibo di falta di cuido specialisa na Aruba cu e dokternan ta nenga di opera. Pues nan kier manda nan yiu pa Colombia unda si tin e facilidad pa por haya su operacion. Pero e dokternan no kier firma pe tratamento afo, nan ta bisa. Y AZV tampoco ta yuda nan.
AZV
AZV ta reacciona cu no a ricibi un peticion di e specialistanan pa Lunah haya tratamento afo. Pero despues tur e comentario den comunidad, specialmente riba medionan social, nan a dicidi di invita e famia pa un combersacion. Esaki a tuma luga ayera. “E deseo di e famia ta pa e baby por wordo manda Colombia pa tratamento medico. Normalmente ta asina cu e specialista medico ta haci un peticion, pero a base di e reunion cu e famia AZV a entrega un peticion na e comision di specialista cu ta duna conseho tocante tratamento medico den exterior (CGZ)”, AZV ta declara. Tambe nan ta bisa: “Representante di e departamento medico di AZV tambe a presenta e caso na dos specialista medico na Colombia pa haya un second opinion. Despues di e conseho di e comision, AZV lo tuma su desicion final si e baby mester bay den exterior pa tratamento.”
