E meta ta pa yega na sterilisa 400 cacho di caya, pero no ta conoci ainda si Departamento di Salud conhuntamente cu United Dogs of Aruba Foundation a logra durante nan accion grandi na San Nicolas siman pasa.
Hunto cu un gran cantidad di boluntarionan nan a piki cachonan di caya pa asina cuminsa cu e procesonan di sterilisa. Diaranson nan a piki 90 cacho, segun e relato di e departamento envolvi, unda cu nan a sterilisa y castra 70 cacho. Tambe a sterilisa algun pushi, segun director United Dogs of Aruba, Mercedes de Bruyn. Nan tabata spera cu diahuebs nan por a yega e cantidad di sterilisa 100 cacho. Nan tin un plan con pa traha unda cu tin 2 ‘trap team’ cu ta piki e cachonan pa asina veterinarionan por cuminsa opera te cu 6or atardi.
E organisadonan a pasa den diferente bario pariba di brug pa haya un bista real di e situacion di e cachonan di caya. Tambe a traha hunto cu e ciudadanonan di e bario riba un plan di captura di e cachonan aki. Datonan di Plataforma Ley di Cacho ta mustra cu tin un cantidad grandi di cacho riba caya y pe motibo aki a opta e biaha aki pa pone atencion solamente na e barionan di pariba di brug, segun e organisacion.
Riba Facebook e fundacion United Dogs of Aruba awor ta haci un yamada pa hende adopta e cachonan sterilisa cu nan a capta. No ta conoci pa cuanto bestia nan a logra di haya un doño nobo te awor.
