Trahadonan di duana na Barcadera a blokia e entrada awe mainta pa motibo di e situacion na trabou. Manera conoci e waf di Barcadera ta den construccion pisa pa cu e mudamento di e waf di container di Playa pa Barcadera. Esaki a trece hopi molester di stof segun e trahadonan, segun e fuente Amigoe Aruba. Tambe nan tin problema cu e trabou di control cu nan mester haci cu 4 persona locual no ta suficiente segun nan. Y nan no ta sinti nan mes sigura den nan trabou pa falta di arma y bulletproof vest.
(potret Amigoe Aruba)
Den Bon Dia Aruba a sali un articulo mas extenso riba e conflicto aki:
Duaneronan a mustra nan mal contento y a para trabou
ORANJESTAD – Trahadonan di Cuerpo di Duana na Barcadera a dicidi ayera mainta di pone trabou abou y esaki tabata basa riba e desaroyonan negativo cu ta pasando na trabou. Edward Maduro president di sindicato SADA a indica e motibo cu e trahadonan a tuma e decision di mustra nan mal contento y para trabounan.
E duaneronan cu ta traha na Barcadera ta sumamente cansa cu e situacion cu nan ta pasa aden eyriba. Nan a cansa di e manera con e construccion ta andando y pa e motibo aki a dicidi di bisa cu esaki ta di mas y a para trabounan. Segun sindicato SADA, nan a pone director na altura cu e coleganan di Barcadera a sali afo y cu lo bay wak kico ta e situacion y lo informa esaki. Siman pasa un e-mail di parti di e coleganan cu ta representa tur e otro coleganan na Barcadera a wordo manda. Den e carta nan ta splica kico ta pasando cu e construccionnan y den ki punto e ta afectando e trabou di duana.
Sorprendi cu situacion
E sindicato a keda sorprendi ora cu nan a mira e desaster cu tin na Barcadera, loke ta e parti di construccion. Nan a tuma nota di varios aspecto kico ta andando y diahuebs a pone e director na altura di e situacion na Barcadera no ta uno miho. Sigur no pa e coleganan duanero. E sindicato a tuma e tempo pa papia cu e trahadonan diabierna pa asina scucha nan disgusto. Durante un excavacion cu a tuma luga diahuebs, e tubo di awa a wordo ranca como tambe liña di SETAR y Internet. Algun siman pasa nan a keda mas o menos dos siman sin comunicacion por completo di parti di SETAR y conexion di Belnet. Un biaha mas nan ta den e mesun situacion.
A dicidi di papia cu e hefe di e seccion di Barcadera, kende ta full di acuerdo cu e accion di e coleganan, pasobra e tambe ta haya cu no ta na su luga con e duaneronan ta wordo trata, con e construccion ta andando. E hefe ta di pensamento cu mester bin na un solucion pasobra no por ta asina cu ta pone bida di e trahadonan na peliger ya cu tin excavatornan ta core rond manera loco. Hendenan ta subi tereno y wak rond pero nan no tin un badge, no tin control adecua na porta, contratista, ken cu ta, ta cana kibra.
Sr. Maduro a mira diaranson con hende a cana drenta y no tabata tin control na porta, APA no tabata pidi nan badge. Esaki ta un situacion hopi peligroso, no solamente pa e ambtenaar su siguridad personal, pero e situacion aki ta afecta pais Aruba. No por para responsabel kico ta drenta Aruba.
No tin control
Mirando cu ta tumando luga desaroyonan di trabou riba Barcadera, e pregunta importante ta dicon no a trece e keho aki prome. President di e sindicato a indica, cu esaki ta pa falta di personal y esaki ta pone cu e cos aki ta bayendo malo. Sa cu e construccion a andando y mester termina na 2016. Diaranson ultimo ora cu a bay na Barcadera y mira con e situacion ta, el a bin compronde kico e coleganan ta kehando. No por ta asina cu control di duana ta sosode simultaneamente cu e construccion. E situacion aki ta uno insigur pasobra tin hende ta yega eynan, contratistanan ta cana yega na e barconan pidi cos, bay cu cos mientras cu tin control adecua. Na Barcadera falta di personal, di cual no tin personal suficiente. Tin un fluho di 200 hende ta trafica pa dia y pa tin 3 of 4 ambtenaar di duana no ta suficiente. Si tin un control adecuado cu ta limita entrada di personanan kico nan ta bin haci riba waf, cu 6 pa 7 hende lo ta sigur pa cuminsa. Aruba Ports Authority (APA) su parti di trabou ta hiba control na porta. E tin cu controla hende cu ta subi riba waf, controla cu nan badge ta indica cu a subi tereno. “Tambe tin cu controla autonan priva cu ta subi waf. APA tin cu controla. E importacion ta control di duana. Nan tin cu controla e carga cu ta yega di afo, tin cu controla cu ta exportacion. Tin cu haci un control riba nan. E parti di APA no por duna mucho cos riba esey” Sr. Maduro a indica.
E problema aki a wordo treci dilanti cerca e coleganan cu a bay den accion. SADA ta di opinion cu sea e construccion ta para of e trabou di duana ta para. No por ta asina cu riba e waf tin control di duana ta tuma luga y simultaneamente construccion ta andando. Tin un parti apart di e waf cu ta trahando riba dje ta, e pensamento ta laga e construccion sigui un banda, apart di e caminda cu nan ta traha y ora caba cu nan trabou, e ora e construccion por sigui. Pero no cu nan ta bay sam, sam. Esaki ta un situacion cu nan no lo bay acepta mas.
Bay waf na playa
Diahuebs a papia cu e director, kende a expresa cu tanten cu e waf keda cla, mientrastanto mester bay na waf na playa. Nan sa cu e construccionnan mester sigui y cu e trabounan tin cu keda cla pa asina por haya e waf nobo, pero no por sigui den e situacion cu nan ta. Ta hopi iresponsabel pa laga un ambtenaar traha den un situacion asina aki.
