Ayera mainta e werksternan of trahadonan di limpiesa na servicio di SKOA, y afilia na sindicato SEPPA, a inicia un accion di protesta cu lo por sigui escala, si nan no ta haya un solucion pronto, ya cu nan ta sinti cu nan trabao ta na peliger.

E grupo di trahado aki tabata uno grandi cu a conta cu sosten di otro sindicatonan manera SIMAR y SABA, y tambe di e trahadonan di Ambiente Feliz. Te hasta nos por a mira presencia di pastoor Jairo Maduro kende a abstene di duna su comentario. Pero si el a bay duna sosten na e accion aki, ya cu nan ta trahadonan cu ta brinda nan labor importante den tur instalacion escolar di afiliacion Catolico.

E trahadonan pa medio di sindicato SEPPA a pidi claridad y un decision. Si nan no ta haya un contesta satisfactorio e accion aki lo sigui escala.

Minister di Labor

Minister di Labor Glenbert Croes a bisa cu gobierno lo garantisa cu e grupo aki di 91 trahado, no lo perde nan trabao. Awe den conseho di minister, nan lo trata e carta of manifiesto entrega pa SEPPA den nomber di e trahadonan aki. Ta depende di gobierno su contesta si nan lo sigui cu nan accion si of no. Kiermen si e contesta no ta satisfactorio pa e trahadonan tur scol bao SKOA no lo wordo haci limpi.

Minister Croes a compromete su mes como mandatario di Labor pa tur e trahadonan aki por keda cu nan trabao. El a agrega gobierno di Aruba ta para den e mesun pensamento aki. Tambe el a haci un apelacion na SKOA pa no manda niun carta pa retira niun werksternan. “Pasobra nos ta bay haya un solucion,” el a bisa.

El a laga sa cu a wordo pidi intermediacion di Mediador di Gobierno pa yuda gobierno cu un conseho. Pero e meta ta cu bao e circunstancia dificil cu nos ta pasando aden, gobierno kier evita pa mas hende perde nan trabaonan.

SEPPA

E lider sindical di SEPPA, Magaly Brito a bisa cu esaki ta un problema andando for di basta tempo y cu finalmente a haya claridad.

Sinembargo e minister di Enseñansa, Armando “Rudy” Lampe no a honra e protocol y acuerdo cu a keda firma pa garantisa e trahadonan di limpiesa aki, nan beneficionan secundario. P’esey nan ta considera e posicion di minister Lampe contra di e palabracionnan haci, y tambe den contra di un lucha largo cu e trahadonan aki ta bin hibando desde añanan 90.

El a splica cu e problema a cuminsa for di 2019, caminda minister Lampe pa medio di un carta dirigi na SKOA a trece den discusion henter e tema di subsidio.

Minister Lampe su posicion ta cu SKOA no mester a paga e beneficionan y condicionnan secundario cu e trahadonan aki tin. Teniendo nan cuenta cu e mandatario su posicion, SKOA a yega di papia cu e trahadonan caminda e fundacion a splica nan e panorama laboral y su efecto pa nan. Ya cu teniendo cuenta cu e desaroyo di esaki, eventualmente SKOA no ta mira otro opcion cu kita nan di trabao.

Actualmente e trahadonan ta ricibiendo nan salario, pero cada luna como SKOA ta generando mas debe ainda. Nan debe ta surpasando 11 miyon florin caba, y ainda no tin claridad riba e placa di subsidio cu nan mester ricibi for di gobierno.

Minister Lampe a yega di bisa cu SKOA debe gobierno placa cu nan a duna di mas. Pero e debe aki tin di haci cu locual SKOA ta bin pagando e trahadonan aki, a base di acuerdonan. SEPPA ta kere cu loke e trahadonan aki ta bringando pe, ta un derecho adkiri.

Desigualdad

SEPPA no ta kere cu e posicion y beneficionan cu e werksternan na servicio di SKOA ta defende ta trece desigualdad compara cu e werksternan na servicio di otro fundacion. Tampoco nan no tin e status di ambtenaar.

Brito a bisa cu e trahadonan di limpiesa di SKOA no ta pretende di ta ambtenaar, y tampoco niun trahadonan den otro fundacionnan. E asunto aki tin haci cu e acuerdonan cu tin y tambe riba cierto condicionnan, caminda e fundacionnan ta wordo subsidia. “E no ta diferente na otro fundacionnan,” el a bisa. E sindicalista a agrega cu e trabao di limpiesa den otro organisacion ta wordo subsidia di e mesun forma aki.

Encuanto si SKOA ta procede di forma ilegal, Brito ta haya cu e punto aki no ta comprendibel pa SEPPA, pasobra netamente na 2013 nan a yega na acuerdo cu gobierno riba e tema di werksternan y despues nan a traspasa e acuerdo aki den esnan den enseñansa.Por lo tanto SEPPA no ta compronde kico ta e parti di desigualdad y e parti di ilegalidad cu e minister a yega di referi na dje.

Brito ta haya cu si ta asina mes cu e minister di Enseñansa e tempo ey no a ehecuta tur cos corectamente, e mandatario actual en bes di crea e caos aki cu e ta bin creando pa e werksternan y den henter sector di enseñansa, e mester drecha nan. “No bisa cu e ta elimina nan pasobra e ta hay’e incorecto,” el a declara.

Cobransa

Segun Brito, no tin claridad sino imposicion di banda di e minister di Enseñansa di un suma di placa cu e ta cobrando SKOA. SEPPA ta sinti cu esaki ta generando hopi problema. Nan ta mira cu SKOA ta wordo poni lomba contra muraya cu e debe aki, locual ta mustra cu e fundacion aki na corto plaso lo bay tuma medida di kita trahadonan. Mientras el a agrega cu e mandatario ta pusha pa e trahado aki bay traha na servicio di companianan priva.

“Mi no sa ken a bis’e cu e trahadonan aki lo kier traha eynan mes,” el a bisa.

P’esey nan a dicidi di bin cu accion aki pa demostra cu nan no ta di acuerdo cu minister Lampe, ya cu esaki ta un lucha largo di e werksternan en general di e sector publico pa logra e derechonan aki.

E sindicalista tabata enfatico pa bisa cu como dunado di trabao, SKOA mester cumpli. Pero como gobierno tambe nan mester cumpli cu e acuerdo cu tin. Den e momento aki e problema ta contra e trahadonan di limpiesa. Pero SEPPA ta mira cu na nivel di enseñansa, ni e docentenan y tampoco niun personal di e sector di enseñansa, no tin e paz laboral den e ultimo casi 4 aña di e gobierno actual.