Ayera mainta na Citgo di San Nicolas, trahadonan, miembronan di staf y sindicato di FTA a bay den accion otro biaha mas, pa motibo di e situacion cu ta hayando actualmente despues cu Citgo a anuncia e fin di nan operacion pa fin di e luna aki.

Hubert Dirksz, presidente di sindicato FTA a splica cu ayera mainta nan a bay den accion bek, pa motibo cu nan kier haya claridad di loke ta spera e trahadonan aki, forsa pa un trato mas husto cu segun e mes a sigura nan no a logra.

Asina mes, el a manifesta cu na e momentonan aki cu nan a dicidi di para trabou, nan a haya dos invitacion, un di bureau di prome minister Evelyn Wever-Croes hunto cu consehero di Refineria di Aruba (RDA) y otro di mediador di Gobierno, cu ayera mainta a haci un reunion cu nan pa intermedia den e problema.

Dirksz a señala cu lamentablemente ta asina cu nan no a pensa cu e situacion lo yega asina leu di para trabou, pero manera e trato ta y despues di tanto intento cu nan a haci tambe cu mediador di Gobierno pa haya partidonan na mesa y sali for di e problema, nan no a logra.

Nan ta exigi di Citgo cu e dianan binidero, nan por medio di e traspaso ta keda responsabel y nan tin cu cumpli cu e pago di e trahado. Pero en todo caso, si esey ta bay e trahadonan mester nan placa, aunke esey no ta problema. Nan ta lucha pa un trato husto y nan ta kere cu mester bin claridad riba nan exigencianan.

Tocante declaracion di prome minister Evelyn Wever-Croes, cu siman pasa a keda conoci cu Gobierno no por involucra den esaki pa motibo cu ta problema di Citgo y nan trahado, Dirksz a bisa cu si tin hopi relacion. E dunado di trabou ta Citgo, pero Gobierno ta responsabel pa RDA y nan ta buscando un operador nobo, loke ta nifica cu automaticamente nan ta envolvi.

E problema di e nivel aki, Dirksz a comenta cu den caso si e paro ta extende y por ehempel e dia di awe no tin fuel pa WEB of pa avionnan, ni gasolin pa pais Aruba, lo bira un problema. “No bin bisa mi cu no tin nada di haci, pasobra si tin tur cos di haci, al contrario e ta laba man, e mester asumi su responsabilidad”, Dirksz a expresa.

Tambe el a informa cu nan mester tene na cuenta cu ta trata di un grupo di trahado cu hopi aña di servicio y cu nan deseo ta pa tur di nan bay para riba e lucha aki, pa motibo cu tur ta bibando e mesun situacion.

Dirksz tambe a splica cu di e dos reunion nan por keda cla cu e situacion aki, pa motibo cu si e accion permanece y yega e momento cu no tin fuel ni gasolin pa e isla, lo bira un problema grandi. Pero esey no ta e caso aworaki, te ainda no a presenta ningun riesgo pa e parti ey, pero si e accion ta sigui, e ta kere cu si.

Michael Geerman, shop steward di staf di Citgo Aruba Refinery Company, a duna di conoce cu e accion di ayera tabata pa demostra nan mal contento y e mal trato cu nan ta haya, no solamente for di nan doño di trabou, sino cu tambe di Gobierno, cu den caso aki ta e accionista principal di RDA.

El a bisa cu prome cu aña pasa a caba, nan a sinta cu gerencia di Citgo y cu RDA pa busca aclaracion di kico ta status di trahadonan, si nan ta bay sigui si of no. Y na final di cuenta ken tin e responsabilidad pa cumpli cu trahadonan.

Tambe el a informa cu nan a haya un sorpresa dia 24 di december ultimo, unda nan dunado di trabou a comunica cu nan a haya e opdrag – y e carta ta bisa cu nan a haya esey di Gobierno – pa termina contract di tur trahado y loke nan a haya di compensacion ta e base minimo di locual ley ta regarda. “Pa nos esey ta un ofensa”, Geerman a sigura.

Pa finalisa, Geerman a afirma cu e deal cu nan a haya ta un cu e trahado mes boluntariamente ta bay firma su retiro. Pero e no ta kere cu esey lo sosode, pa motibo cu e mercado di labor na Aruba ta asina comprometi cu e personanan aki no por haya trabou, mirando e proporcion di traha den un refineria cu no ta un profesion facil pa haya trabou. Esey kiermen cu e mayoria di nan mester bandona e isla y nan famia pa acepta retonan den exterior pa nan por sigui sobrevivi.