Ayera mainta trahadonan di e compania Calloway Corporation Airline Catering representa pa sindicato FTA tabata dicidido, y nan a mustra nan malcontento pa medio di un accion di protesta dilanti di e compania aki.

Nan no ta acepta cu e compania no kier a paga bonus e aña aki. Apesar cu esey ta un di e condicionnan di nan contracto colectivo (CAO). Nan ta haya inhusto cu, ademas cu nan a entrega 40% di nan salario, toch gerencia di Calloway no kier paga bonus.

FTA y e trahadonan ta consciente cu situacion no ta facil na Aruba, pero semper nan a keda traha. Ademas nan ta dispuesto tambe pa sacrifica un 40% di nan bonus, basta cu e ta wordo paga y respeta loke ta para den nan CAO vigente.

Despues di un reunion cu gerencia di e compania y vice-presidente di FTA, Abogado Hose Figaroa, finalmente e trahadonan nan posicion a prevalece. Abogado Figaroa a laga sa na Bon Dia Aruba cu e compania a dicidi paga bonus di Pasco. Aunke e tabata un 40% menos, pero e trahadonan for di ayera mes a cuminsa wak cu e placa di bonus di fin di aña a drenta den nan cuenta di banco.

Acuerdo

For di principio cu e accion di protesta aki, FTA nan intencion tabata di por a yega na un acuerdo. Mientras cu nan no ta yega na un acuerdo e trahadonan no a bay traha, asina Geerman a expresa.

Nan a cuminsa sinta na mesa na Calloway mes pa yega y firma un protocol. Y unabes cu FTA tabata haya sa ki dia nan lo paga bonus, nan lo stop e accion aki locual a sosode. El a agrega cu nan no a pidi 100% sino 60%, asina e trahadonan mustra nan comprension. Gerencia di Calloway a tuma contacto cu nan oficina principal na Trinidad pa asina haya luz berde pa cuminsa paga e bonus, y asina e trahadonan por bay bek na trabao.

Prome cu nan a yega na un solucion e lider sindical di FTA, Rudy Geerman a laga sa cu e trahadonan tabata basta disgusta, ya cu gerencia di nan banda a dicidi pa su mes di stop di paga bonus pa e trahadonan. Mientras cu tin un acuerdo of CAO cu nan mester paga bonus. Pues e ta kere cu mientras cu tin un acuerdo un parti so no por cambi’e. E mester ta di acuerdo mutuo. “Nos sa cu tin un situacion hodido na Aruba, pero den full mundo,” el a bisa.

E trahadonan -segun e dirigente di FTA- tin un CAO cu ta vence aki dos aña, pero asina mes si no tabatin CAO, e acuerdo aki ta keda vigente. Pero el a cuestiona cu e manera di trata hende den e compania aki ta increibel!.

E ta haya cu e minimo cos cu e compania por a haci tabata yama e sindicato y splike cu nan no por paga bonus, pa asina yega na un acuerdo. “Pero abo so por dicidi cu bo no ta paga niun cen. Esey e trahadonan no a bay acepta.” e sindicalista categoricamente a bisa.

E sindicalista a agrega cu e situacion aki ta uno dificil y nan como sindicato representando e trahadonan aki tin comprension. Un gesto di comprension ta cu e trahadonan aki ta cobrando 60% so. Te hasta den tres ocasion FTA a sinta na mesa cu intermediacion di Mediador di Gobierno pa purba di yega na un solucion, pero na e momento ey, Geerman a haya lamentabel cu gerencia di e compania no kier a tende. Nan a keda para ariba cu nan no tin placa y esey a conduci cu e trahadonan a bay protesta ayera mainta.

Ta trata aki di un grupo di 45 trahado di un total di alrededor di 70 trahado. El a laga sa cu Calloway a reduci un cantidad di hende den e ultimo dos lunanan. “Casi 40 trahado a bay cas. E personal ta basta limita mes. Pero e trabao si a keda casi mesun hopi,” el a bisa. Esey ta conduci cu e trahadonan ta traha basta duro.