Accion di “swipe” ta sigui den Oranjestad

“Sin e sosten di comunidad, ta casi imposibel pa nos combati y elimina e sangura cu ta plama Dengue, Chikungunya y Zika”, asina Minister dr. Alex Schwengle a subraya na cuminsamento di e accion di “swipe” dos siman pasa. Den e accion aki Departamento di Salud Publico, Gele Koorts en Muskieten Bestrijding, Serlimar,  City Inspector y DOW a uni esfuersonan pa cuminsa “swipe” for di punta pa punta di nos isla.

E accionnan aki ta sigui e siman aki den e area di Oranjestad West, cu ta inclui Dakota, Madiki Kavel y Companashi, entre otro. Riba diahuebs 3 di maart y diabierna 4 di maart e accion  di fumigacion ta sigui den e siguiente cayanan, di atardi pa anochi entre 5’or y 7’or. Riba dia 3 di maart lo bishita Beaujonstraat, Druivenstraat, Caya Juancho Kock, Rondweg, Sabana Blanco, Appelsinastraat, Avenida Milio Croes, Dadelstraat, Cantaloupestraat y Calabasstraat. Riba dia 4 di maart lo spuit den Caya Ernesto Petronia, Madiki, Avenida Alo Tromp, Boliviastraat, Arendsstraat, Venezuelastraat y Madiki Kavel.

Ta pidi pa habitantenan pa habri bentana y portanan durante cu e pickup ta fumigando den nan bario. Empleadonan di Departamento di Salud Publico ta avisa pa personanan cu un condicion di salud delicado keda paden y no habri bentana of porta pa no perhudica nan salud. Tene bista riba mascotanan y parhanan, y cambia e awa di e mascotanan pa awa limpi despues cu e pickup cu ta fumigando pasa.

Durante di e accion di SWIPE den e districto di Noorda registra basta situacion nan indeseabel. Den e prome siman di swipe aki a controla 697 cas, di cual a trata 3794 criadero potencial, tambe a haya 57 cas cu un of mas criadero activo di “Aedes aegypti”. E criaderonan mas comun tabata scoter bou di mata, bari habri y hemchi, cual ta criaderonan cu nos mes ta causa rond di nos casnan. Na tur a topa tambe cu un total di 52 cas cu pos habri cu ta causa hopi molester di sangura.

E team multidisplinario ta bishitando tur cas, nan ta check pa criaderonan, elimina e criaderonan existente, y ta tuma accion pa cu prevencion pa tin criadero dor di tene e luga limpi, bay cu autonan bieu bandona, artefactonan electronico benta den mondi, y asina por sigui menciona. DOW a pone por lo menos nuebe trahado disponibel, cu ta sirbi como sosten adicional na e ekipo di inspectornan di GKMB. 

Ta sorprendente pa mira cuanto criadero tin den areanan relativamente chikito. Ta masha comun pa wak cantidad di “zwerfvuil” den cualkier mondi chikito. Cup bashi, foambox di cuminda, tapa di boter di refresco, etc. tur ta bira un criadero asina cu poco awasero cay riba nos isla. 

Jerry Staring, di e Management Team di Departamento di Salud Publico ta subraya cu sin criadero no tin sangura y sin sangura lo no tin ni Dengue, ni Chikungunya y ni tampoco Zika. E contribucion di comunidad ta sumamente valioso y esencial pa por logra elimina e criaderonan.

E trabounan ta parti den tres diferente fase. Den e prome parti e ekiponan di control di GKMB lo bishita e casnan pa check pa criadero, den e di dos fase Serlimar lo duna un man pa elimina tur “grofvuil”, y den e di tres fase lo fumiga e areanan caminda a topa cu mas criadero y presencia di sangura.

Ta bon pa menciona cu pa dos luna largo un total di 12 grupo lo bishita bario pa bario den e districtonan tur rond di nos isla. Casnan habri lo ricibi bishita den siman, casnan cera lo ricibi bishita riba diasabra. Lo fumiga tur bario na momento cu a controla henter e bario. Fumigacion lo tuma luga riba diahuebs, diabierna of diasabra.