Accion di firma contra Stichting Publieke Onderwijs

SEPPA a organisa un otro reunion informativo pa minister di Enseñansa por a haci su presentacion riba e cambio pa DPS bira un fundacion.

Pero mayoria di nan presente no a keda convenci cu e intencion cu supuestamente e mandatario tin pa eleva e calidad di enseñansa. Actualmente ta tumando un accion di firma contra e cambio aki. Nan ta mira cu e cambionan mas tanto tin di haber riba aspecto financiero pero no riba enseñansa mes.

Nan ta haya cu e mandatario no por demostra cla kico lo bay haci e diferencia. Ademas nan ta haya cu e minister en cuestion no ta consistente. Den cada reunion e ta cambia su pensamento y vision y esaki ta trece ‘mal contento y desconfiansa’, asina secretario general di SEPPA, Magaly Brito ta declara na Bon Dia Aruba. El a agrega cu e reunion a bay ‘hopi bon’.  Mayoria di e trahadonan di DPS no ta di acuerdo cu e intencion di e mandatario, pasobra nan no ta wak pa kico.

E sala di reunion di SEPPA na Hato tabata basta yen. Esaki tabata e dos reunion cu SEPPA a organisa pa trece mas aclaracion cerca nan miembronan riba e independisacion di DPS. Mientras tabatin docente miembro di SEPPA pero tambe di SIMAR cu a yega di atende e reunion cu e sindicato aki a realisa riba e mesun tema. Den e reunion aki a participa e docentenan di otro scolnan cu publico cu no a bini e reunion di diahuebs siman pasa.

Accion di firma
Algun di nan a yega di expresa cu te ainda nan no por compronde e intencion y meta di e cambio aki.  Den varios scol publico ta tumando luga un accion di firma pa rechasa e tipo di cambio aki. Nan kier mustra na e gobernantenan y parlamentarionan cu e idea di cambia  DPS den un fundacion no ta carga e sosten por lo menos di e grupo grandi di trahadonan cu ta resorta den e departamento aki.  Algun di nan a cuminsa sondea e posibilidad di sostene un reunion cu e miembronan di e diferente fraccion den parlamento pa canalisa nan preocupacion.

Tanto docente como no docente di DPS  ta masha preocupa y nan ta mantene nan posicion. E decision di haci DPS un fundacion ta regarda tur hende cu ta traha den e departamento aki.  E sindicato lo sigui purba di duna mas informacion mas lihe cu ta posibel. Te na momento aki e mayoria di e trahadonan di DPS ta contra di e cambio aki,  y nan no ta mira niun argumento solido di parti di e minister.