Apesar cu e actual minister demisionario di Medio Ambiente, Mike de Meza a priminti cu e ley cu departamento di Medio Ambiente y Naturalesa a saca fei di cashi riba proteccion di cierto sorto di pisca no ta wordo ehecuta, Centro di Pisca Hadicurari no ta confia mucho y nan kier wak esaki preto riba blanco. Tambe nan lo organisa un reunion cu tur piscadonan.
Nan ta piscanan cu pa e mayoria di e piscadonan ta imposibel pa bin no cu un regulacion, sino cu un prohibicion, mirando cu nan ta piscanan cu nan ta sobrevivi cu ne. Tambe tin pisca cu nan ta uza como as manera buni of tuna cu a wordo inclui riba e lista di prohibicion di e ley controversial aki. E buni ta un pisca necesario pa nan por realisa nan actividad di pesca ya cu sin e buni como as, dificilmente nan por pisca. Nan no sa y tampoco tin clarificacion pa kico e buni ta aparece riba e lista di prohibicion.
Reunion
Durante un conferencia di prensa na 7 West, Clifford Rosa bistiendo su pechi di presidente di e fundacion aki a vocifera e preocupacion cu e piscadonan local tin si e ley aki cu ta vigente caba ta wordo ehecuta.
Nan lo bin cu un reunion dia 10 di october na Piedra Plan Entretaiment Center pa 7’or anochi no solamente pa e piscadonan sino pa tur esnan interesa tocante e ley aki. E ta invita tur piscado, kiermen esun di baranca, reda y boto pa tey presente.
Mirando cu e fundacion aki ta traha pa conserva e sector primario di pesca na Aruba y e piscadonan local y artesanal, nan ta haya nan mes sorprendi cu e tipo di ley aki cu a wordo introduci sin consulta prome riba su impacto economico y social. “Esaki ta sigur cu ta algo cu no por bay sin mas”, el a bisa.
Segun sr. Rosa, nan por compronde cu e ley ta den transcurso y practicamente den ehecucion. Aunke te ainda niun piscadonan nan piscanan no a wordo confisca pa nos autoridadnan, pero nan por ripara algun tipo di accion caba den e direccion aki.
E ta haya cu como Centro di Pesca Hadicurari nan a yega di trece e tipo di informacion aki dilanti pa mustra ‘cu tin algo cu no a cana bon’. Ya caba den otro conferencia di prensa nan a cuminsa pone e piscadonan y tur hende na haltura di kico ta pasando.
El a bisa cu e fundacion aki a sinta cu gobierno particularmente cu minister De Meza, y tambe cu departamento di Naturaleza y Medio Ambiente. Durante nan reunion a wordo treci dilanti cu gobierno lo haci su trabou pa asina aki para e ehecucion di e ley y informa e instancianan manera wardacosta of polis maritimo. E decision cu a cay tabata pa no actua contra e piscadonan tanten no lo bin un sondeo di kico e piscadonan ta pensa tocante di e ley aki.
Informacion
Den e reunion nan lo trece dilanti tur informacion cu nan tin disponibel cerca e publico presente. Tambe nan lo bay tin un accion di firma di e piscadonan pa sostene un carta dirigi pa Gobernador di Aruba pa medio di Parlamento di Aruba. “Pa asina aki mustra e malcontento cu e mundo di piscado tin akinan na Aruba”, segun Sr. Rosa.
Apesar cu e proceso di formacion pa un gobierno nobo ta andando nan no kier warda te ora cu e gabinete nobo ta sinta, sino cu nan kier sigui traha pa busca un solucion riba e introduccion di e ley menciona cu ta afecta e piscadonan local. “Nos como esunnan afecta no ta worry ken ta forma gobierno…”, el a indica. Pues e no ta haya cu esaki ta bay pa gobierno directamente sino pa e departamentonan di gobierno entre nan departamento huridico pero muy particularmente e departamento di Naturaleza y Medio Ambiente cu a pusha pa bin cu e ley aki.
Actualmente nan ta mantene nan mes riba e parti di e piscanan pero nan sa cu e ley aki ta uno cu ta afecta nos sector primario completamente. Nan a cana tur caminda nan a sinta cu departamento di Naturaleza y Medio Ambiente y cu e ministerio tambe y te awe nan ta wardando riba e carta cu nan a wordo priminti pa pone e suspension di e ley aki preto riba blanco. Nan no ta sigur cu si pa motibo di e cambio di gobierno e carta aki no ta bin cla tampoco. Sinembargo e fundacion aki tin speransa cu e palabracion haci cerca minister De Meza lo wordo ehecuta “pero bo ta mira si cu bo no por bay tras di palabracion”. P’esey e ta haya cu pa cera e capitulo aki tur cos mester ta preto riba blanco mirando cu ta trata di un ley cu si ta preto riba blanco y cu a cana su caminda.
Nan ta sostene tur sector cu tambe lo kier expresa nan disgusto pa cu e ley cu a sali di sorpresa considerando cu no tabatin niun envolvimento di e NGO’s.
