Diaranson mainta, cuerpo policial tabata controlando den area di Seaport. Vocero di KPA, Liliana Rasmijn a informa cu ta relaciona cu un proyecto di Polis di Bario di Oranjestad, cu a cuminsa desde dialuna.
Conhunto cu Aruparking unda cu desde dialuna a parti 45 multa, tabatin un detencion y a takkel 5 auto. E detencion tabata pa motibo di core auto sin rijbewijs. Rasmijn a bisa cu tur dia tin control di trafico pa tur papel.
Sinembargo, si bin haya algo extra tambe nan lo duna boet riba esey. “Nos por bisa cu diamars a cuminsa cu control na Camacuri y a parti 64 multa, 3 detencion y a takkel 6 auto. Den e tres detencion tabatin un persona ilegal y otro dos a keda deteni pa motibo di core sin rijbewijs.”
Rasmijn ta menciona cu hende no ta pensa cu nan mester tin nan rijbewijs cu nan. Unabes cu no por mustra un rijbewijs valido y no tin’e cu su persona, ta detene e persona y hib’e warda di polis. E consecuencia cu ta takkel e auto y tin mas gasto cu e persona tin cu paga.
Ayera e control di trafico a cuminsa for di 6or di mainta. Segun Rasmijn, loke a resalta mas ta persona cu ta core cu nan celular den man. “E ta yega asina leu cu ta para e persona y nan mes no ta realisa of ta consciente cu nan tin celular den nan man. Nan ta haya boet a base di esey. Ta peligroso pasobra mayoria di accident cu ta dal auto patras ta pa motibo di celular.”
E control cu ta tumando luga lo keda te cu diabierna y lo varia entre mainta, atardi of anochi. Cuerpo policial ta enfatisa tur dia pa hende tin nan papel na ordo. Segun Rasmijn, e comentario di hende ta cu ‘polis nos tin nada di haci’, pero ta haci control pa siguridad den trafico, p’esey ta bisa pa tin tur cos na ordo.
“Ora un auto cu no tin seguro dal den bo auto, e ora polis nan ta yama y nos no por haci mucho pa e gasto cu ta bay confronta cune. Control ta un prevencion y no ta kita hopi di bo tempo, 3 pa 4 minuut ta tuma control, check si tur cos ta bon y por sigui bay trankil”, Rasmijn ta expresa.
Tambe Rasmijn a splica kico ta pasa cu persona cu no tin rijbewijs na momento cu polis para su auto. Ta hiba e persona na warda di polis pa haci control. No tin un sistema online pa check.
Pa locual ta trata e parti di celular, Rasmijn a bisa cu ta haya cu cada ser humano cu ta core auto ‘suficiente grandi’ pa sa e consecuencianan. Nan ta anuncia cu lo tin consecuencia cu boet. “Abo cu ta para patras di stuur, si bo tin famia den bo auto, sea consciente di kico tin mas balor. E mensahe cu a ricibi of e bida di bo sernan keri of persona riba caya. Si e mensahe ta urgente para un banda, contesta bo mensahe y despues sigui bo caminda trankil”, Rasmijn a splica.
Awendia tambe tin diferente artefacto cu por uza pa ora di yamada via celular den auto, cu por ‘haci bo bida mas facil’. E ta algo cu cada ciudadano mester ta mas consciente cu tin un celular den man.
Pa finalisa Rasmijn a bisa cu lo continua cu control. Den sistema nan ta wak tambe si e number di auto ta paga. Tin cu check si papel ta na ordo, carchi di keuring, seguro di auto, number di auto y rijbewijs valido pa persona sigui su caminda.
