E fin di siman aki Partido di Pueblo Arubano AVP a tene su prome accion di Common Good in the Neighborhood caminda e bario beneficia tabata Dakota. Un grupo di entre 50 pa 60 boluntario consistiendo di liderazgo, candidato, miembro y activista di e partido a recore cayanan di Dakota pa recoge e sushi acumula cu tabata afecta e bario.

Lider di AVP, mr. Mike Eman a splica cu e proyecto ta consisti di dos fase. E prome den cual a pasa bishita e habitante durante diferente atardi lagando atras saco di sushi y informacion pa laga haci uzo di e saco y laga e sushi pafo riba e fecha cu lo pasa recog’e.

E di dos parti ta esun cu a sosode diasabra 2 y diadomingo 3 di september, caminda rond di 20 pickup a pasa piki nan pa hiba y tira den bakinan di sushi cu compania a pone disponibel como sosten pa e accion comunitario, algo cu Eman ta hopi contento pasobra e comunidad tabatin mester di dje.

“Bo ta mira cu berdad a cera dump; dump tabata semper un problema, pero djis cera dump y no percura pa un alternativa cu ta pagabel, ta conduci cu ta acumula sushi den cura di cas pasobra nan no tin e fondo pa paga. Por ta pa comercio si, pero pa un famia no,” asina e lider politico a splica, añadiendo cu basa riba loke nan a mira, por bisa cu tin un crisis nacional acumulacion di sushi den barionan pa motibo cu dump ta cera y no tin un alternativa pagabel pa pueblo.

Loke AVP ta contento cune ta cu desde cu a anuncia e programa aki, Minister Ursell Arends a lanta fo’i soño y ripara cu el a haci un desaster pa higiena y medio ambiente. “Cu awo gobierno ta core pone baki disponibel den bario ora a mira e anuncio di AVP, ta aplaudi. Ta spera cu nan lo ta consistente si,” Eman a señala. Mientrastanto Common Good in your Neighborhood cu e biaha aki a haci limpieza, den otro oportunidad lo cubri otro necesidad di e comunidad.

“Esaki ta loke gobierno a haci; a cera dump di Parkietenbos y a habri e dump Aruba,” asina candidato y ex-parlamentario Marlon Sneek a declara. A splica cu e tabata un decision ad hoc y p’esey ta sinti e necesidad di sali y yuda pueblo. Despues di tur aumento cu a conoce den necesidadnan basico, pueblo no ta compronde di unda gobierno ta kere cu lo por bay saca pa paga pa benta sushi afo tambe.

Wendrick Cecilia y Clifford Heyliger tambe a forma parti di e accion di e fin di siman y a describi esaki como uno cu ta brinda speransa y inspira nos comunidad riba e echo cu tin un ruta alternativo y cu tin un vision pa gobernacion den partido AVP cu e bon comun. “Gobernacion kier men atende cu e necesidad di pueblo. Nos tin awe un gobernacion di MEP-RAIZ cu no sa con pa haci esey,” asina e hoben politico Cicilia a duna di conoce. Di su banda, Clifford Heiliger a indica cu AVP lo sigui mustra con si por. Otro miembronan di partido cu por a mira activo den e accion aki di BON COMUN den bario ta Arthur Dowers, Benny Sevinger, Mervin Wyatt Ras, Conny Conner y Junior Croes.

Mike Eman a gradici tur companianan di baki y boluntario cu a haci e accion posibel y ta continua diadomingo den su di dos unda cu ta pone bakinan dilanti di Centro di Bario y Deporte Dakota pa sigui cubri e area panort cu ta bay te Tarabana. Por a mira cu e lider di partido Mike Eman tabata wordo ricibi cu hopi brasa di apoyo den Dakota, locual ta mustra e deseo di pueblo pa un liderazgo atrobe cu ta mira y sinti e necesidad di Pueblo.