Durante siman a circula informacion tocante desaroyonan na Embassy Suites. Bon Dia Aruba a ricibi informacion cu Departamento di Naturalesa y Medio Ambiente ta bay corte. Fundacion Aruba Birdlife Conservation (ABC) tambe ta bay corte, segun su presidente Greg Peterson.

Diabierna 23 di juni mainta, ABC a solicita hues pa stop e proyecto di Embassy Suites te ora cu corte duna su decision si e desaroyo ta legal of no. Esaki teniendo na cuenta cu e durante construccion, a destrui un cantidad di mata di mangel y otro matanan protegi, cual ta contra ley di Aruba. ABC a provee evidencia den forma di potret y video pa sostene nan acusacion.

Abogado di ABC, Geert Rep a bay hues pa haya un orden di corte pa stop e construccion, y e solicitud aki a keda honra pa hues, segun ABC a splica. Asina a duna e constructor e orden di hues pa stop e proyecto te proximo aviso. Durante esaki, a bin hunto cu Departamento di Naturalesa y Medio Ambiente.

ABC awo ta bayendo corte. Nan a indica cu den e area unda ta desaroyando e proyecto tin un especie di mangel protegi, esta Conocarpus erectus, tambe conoci como Fofoti. Ademas, tabatin dos especie protegi di yerba di lama den e area, esta e Thalassia testudinum y e Syringodium filiform. E yerbanan aki ta e habitat pa e animalnan marino protegi conchi, lobster y turtuga di lama.

Reaccion di Prome Minister
 Di su banda, prome minister Evelyn Wever-Croes a reacciona na momento cu a bira conoci cu minister di Naturalesa a bay hues pa stop e actividadnan di desaroyo di Embassy Suites, indicando cu e tabata “sorprendi” pa e accion di abogado di ABC.

“Riba insistencia di prensa, Prome Minister Evelyn Wever-Croes a declara cu e mes ta sumamente sorprendi cu su colega minister a cuminsa un caso contra su mesun gobierno y pues su mes,” a indica a traves di un comunicado di prensa.

“Mi no ta compronde e strategia di e abogado cu a propone esaki, cu ta algo huridicamente incorecto. Mi a pidi colega minister Ursell Arends pa un splicacion kico a bay fout aki, y mi ta pendiente di esaki. E ta un eror grave y esnan responsabel mester carga nan responsabilidad. Pasobra e accion aki por causa daño na e credibilidad di henter nos gobierno, siendo cu demas ministernan no tin arte ni parti den esaki. Nos ta un gobierno serio, mi a lidera nos gobierno durante e pio pandemia cu nos pais a pasa aden, y na forma responsabel y exitoso. Locual a pasa diabierna cu e caso entama pa Aruba Birdlife Conservation, ta ataca e imagen di gobierno y esey mi no ta acepta. Minister Ursell Arends ta trahando pa coregi e eror y e mes lo duna mas splicacion di kico a bay fout. Pues no ta trata aki di problema entre un minister y e resto di su gobierno; ta simplemente un eror”, segun Wever-Croes a bisa den e comunicado.

Pa loke ta trata e caso mes di Embassy Suites, Prome Minister a indica cu Embassy Hotel ta un proyecto di varios gobernacion, y cu e mes a yega y haya e proyecto cla. “Ta un hotel cu ta duna empleo na hopi mama y tata di famia local. Nan a haci un peticion pa por drecha e beach, y nan a haya promesanan di ministernan anterior. DIP a otorga e ‘aanlegvergunning’ pa nan drecha e beach completamente den cuadro di ley y teniendo na cuenta e consehonan di demas departamentonan, y hasta a inclui e recomendacionnan di Directie Natuur en Milieu (DNM) como condicion den e aanlegvergunning.

“Segun Minister Arends y DNM a resulta despues, cu e hotel lo a viola e vergunning otorga. A base di rapport di DNM ta evaluando si esaki ta e caso of no y ki paso mester tuma al respecto.”

Prome Minister ta reitera cu desaroyo economico ta importante pa nos pais por recupera y den esaki mester busca un balans entre desaroyo y naturalesa. Segun e comunicado, gobierno di Aruba ta aprecia e interes di inversionistanan local y stranhero. Aruba tin un sistema legal hopi solido y pues permiso y condicionnan mester wordo cumpli cune. Den e caso aki no ta diferente. E departamentonan di gobierno ta haciendo nan maximo esfuerso pa resolve e situacion mas pronto cu ta posibel.

Minister di Naturalesa

Mientras tanto, minister di Naturalesa, Ursell Arends a bin dilanti tambe pa expresa su mes tocante e acontecimento a traves di un comunicado di prensa ayera.

“Durante transcurso di e ultimo simannan, algun desaroyo a tuma luga relaciona cu un aanlegvergunning pa crea un beach dilanti Embassy Suites,” Arends a indica. “Dia 16 di juni 2023, Natura Development N.V. a haya un aanlegvergunning pa crea un beach, bao di varios condicion. Un di e condicionnan ta cu no por kita of haci daño na naturalesa sin ontheffing di Minister di Naturalesa. Esaki tambe ta un prohibicion regla den nos Natuurbeschermingsverordening.

“Lastimamente, a cuminsa kita un tipo di mata protegi na e sitio en cuestion. Esaki sin un ontheffing di mi ministerio manera exigi pa ley y poni como condicion den e aanlegvergunning”, Minister Arends ta declara.

Segun e comunicado di minister di Naturalesa, Natura Development N.V. ta di opinion cu nan no mester di un ontheffing y cuminsa cu e trabaonan. Motibo pa cual Gobierno mester a actua lihe pa preveni mas daño na naturalesa. Pa para e actividadnan, a opta pa un ordemaatregel. A resulta cu fundacion ABC tabata preparando un paso similar. Den comunicacion rapido cu e abogado di ABC, un peticion pa un ordemaatregel a sali cu a logra su meta di proteha naturalesa e.o. mustrando cu Minister di Naturalesa no a duna un ontheffing.

Den esaki, obhetivo di Minister di Naturalesa ta pa atende e desaroyador cu e mester para e actividadnan y sigui e proceso indica.

Arends a referi tambe na e “kibocacion” cu a pone mustra manera un minister di Gabinete Wever-Croes II ta demandando otro minister.

“E peticion pa e ordemaatregel ta contene un kibocacion cu a crea e impresion cu un minister ta demanda un ministerio di un otro minister. E kibocacion aki no tin mas consecuencia pa e proceso. Mas importante ta cumplimento cu ley y condicion, y proteccion di Aruba su naturalesa. Esaki hustamente tawata ta e meta di e Minister di Naturalesa, cu a actua rapidamente pa preveni mas daño na naturalesa. Gobierno lo actua pa preveni cu e trabounan pa crea un beach lo continua, en espera di e siguiente pasonan legal.”

Minister Arends ta reitera cu pa logra un desaroyo economico sostenibel ta rekeri un balansa entre construccion y naturalesa. Den nos estado di derecho ley y condicion t’ey pa cumpli cune y ta conta pa tur. Esaki ta inclui proteccion di naturalesa. Gobierno ta evaluando su siguiente pasonan, teniendo na cuenta e interes general di pais Aruba y e derecho di tur esnan envolvi.