ACCION 21: Ta lansa tres candidato fuerte cu ta cla pa sirbi e pais Aruba!

Accion21 ta un partido liber progresivo cu ta kere den un aparato gubernamental eficiente, transparente y honesto. Nos kier trece un cambio den e sistema anticua di politica tradicional cu ya pa 20 aña a trece cu ne impactonan negativo pa e comunidad humilde di Aruba.

Aruba no kier scucha promesanan di campaña cu nunca ta wordo cumpli. Aruba no kier pa e clase rico sigui bira mas rico y e pober keda bira mas pober. Aruba no kier wak su muchanan sigui wordo abusa sin ningun proteccion. Aruba kier y ta cla pa un cambio cu lo trece solucion berdadero pa nos hende y pais.

Cu hopi orguyo nos ta lansa nos tres candidatonan:

Edmar Gietel ta para pa combati e problematica grandi di abuso y inhusticia cu ta eherce na Aruba y ta para firme pa e bienestar di nos hendenan. Como tata Edmar a experiencia e abuso y inhusticia di nos sistema actual y a dicidi di tuma e reto pa forma parti di partido liberal y progresivo Accion21 pa asina trece cambio di berdad, paso nos tur como Arubiano merece e miho.

Flora Petronilia ta para pa igualdad di hende homber y hende muhe y ta kere den un isla prospero pa nos tur como Arubiano. Flora a dicidi di tuma e reto den policita door do scoge pa forma parti di partido Accion21 paso e kier enfoca pa trece cambio den e sistema pa trato husto, etico y legal pa nos hendenan den sector laboral.

Gerald Vingal ta para pa trece cambio den nos principionan di gobernacion cu no ta ancra na sistema di politica tradicional y ta kere den e reformacion gubernamental pa e bienestar di nos pais. Gerald ta forma parti di Accion21 pa asina e por forma parti di e solucion pa actualisa y moderniza e aparato di nos sribidornan publico.

Awo ta e momento pa tuma accion. Accion pa revitalisa nos economia, accion pa sanea nos finansas, accion pa alivia e crisis social, accion pa reforma nos sistema gubernamental, accion pa sigui desaroya nos sistema di enseñansa, accion pa intesifica cuido preventivo den salubridad publico y accion pa enfoka ariba sostenibilidad pa salbaguardia nos medio ambiente. Ban kibra nos ciclonan vicioso y recupera un gobernacion confiabel. Hunto, esaki y hopi mas ta posibel. Solucion ta bin ora cu bo tuma Accion!