Diadomingo carnaval di Rio di Janeiro a cuminsa cu desfile di emiho scolnan di samba di Rio di Janeiro, yen di elegancia y splendor manera semper, pero awor e espectaculo a keda mancha for di inicio cu un accidente den desfile di inauguracion, cu a laga cerca di 20 hende herida, 3 di nan den estado grave.

Bao di un yobida constante e incidente a sucede, ora cu e ultimo carosa di scol Paraiso do Tuiuti a drenta riba caminda di sambodromo y a perde control. E scol di di Paraiso do Tuiuti a participa di nobo den categoria di reina, despues di 16 aña cu nan tabata ausente. E truck hopi grandi, caminda tabatin mas di 15 bailarina ta baila, cu tabata bisti paña hopi bunita y di colo tropical a dal contra un tribuna, y eynan mes a laga varios herido, cu yen di sanger riba henter e pista. Un di e heridonan tabatin un pia destrui, periodista di AFP a informa.

“Binti persona a ser atendi den hospital pa motibo di e accidente aki, ocho di nan a ser hiba pa hospital den ambulance, entre nan tabatin tres muhe di mayor gravedad”, secretario di salud di Rio a sigura. Te na e momento aki no tin ningun hende cu a fayece den e accidente.

Renato tabata testigo di e incidente, ora cu e tabata sinta bao di e trapi cu a resulta afecta. El a splica pa AFP cu e truck a dal contra e cura, caminda tabati hopi persona, mientras otro grupo di hende tabata pusha e truck riba caminda, pasobra e Sabatini problema pa core.

Medio di prensa local a raporta cu te na e momento aki tin 4 reportero cu a resulta herida tambe. Despues di incidente e espectaculo a sigui paden y pafo di e pista. E carosa di Paraíso do Tuiuti a continua cu su show y su homenahe di color na movemento tropical di Caetano Veloso y Gilberto Gil. Hopi di e bailarinnan cu tabata riba e carosa a mustra hopi tristo y afecta pa e situacion. Ambulance, bombero, grupo di seguridad a yega na e lugar conoci como “pasarela di Samba” na momento cu e comite di organisacion a dicidi di para e proximo desfile, cu tabata planifica den carnaval.

Cu Ivete Sangalo alegria a retorna
Despues di e lamentabel accidente cu a duna di conoce via megafono, e presentandor di e evento a grita: “bida mester continua”. Y mas di 3 mil miembro di scol Grande Rio, a cuminsa su desfile di homenahe pa Ivete Sangalo, diva di Bahia.

Cu presencia di e cantante Ivette den e desfile, e actividad a lanta animo di mas di 70 mil persona cu tabata den e sambodromo, y asina e show di samba a sigui bati durante henter anochi y madruga den e evento cu nan a yama “e mayor espectaculo di mundo”.