Na mesa di Bon Dia Aruba a yega e informacion cu a sosode un accidente, unda a laga atras otro fayecido mas den accidente di trafico.
Pa 7:30 di ayera anochi, Central di Polis ta haya un melding cu un accidente pisa a sosode riba e caminda principal di Pos Chikito na altura di e rotonde.
Segun informacion tocante e caso, un auto biniendo di playa direccion San Nicolas a dal un homber tire otro banda di caminda y a sigui core bay lagando e homber atras. Dos otro auto a pasa riba e caretera, pensando cu ta trata di sushi benta riba caya y ambos sin mal intencion, un a pasa completamente riba e curpa y e otro a pasa parcialmente riba e cabes prome cu a para na banda. Despues di esaki a resulta cu ta trata di un persona benta banda di caminda y morto.
A avisa ambulance y polis cu urgencia, kendenan na su turno a cera caminda. E prome ambulance cu a yega e sitio a purba di duna e homber asistencia, sinembargo no por a haci nada pa motibo cu e tabata morto caba. Cuerpo Policial a emiti un comunicado tambe unda a detaya cu “Dr. Voskuil a constata e fayecido di un hende homber. Na momento cu e defunto wordo reconoci oficialmente lo publica su identidad.”
Awo polis di trafico y forense lo investiga e caso y persigui e persona cu a dal e homber en cuestion y lag’e atras sin bida, cu basta sla of posiblemente bibo, mirando cu ta existi e posibilidad cu e homber a keda bibo despues di e impacto pero a causa di e dos otro auto cu a pasa riba di dje accidentalmente y a causa di e negligencia di e prome auto, el a perde su bida.
Polis a papia cu testigonan di e area y a segura cu camara den e zona lo ser revisa pa yuda e investigacion aki. Den su comunicado, Cuerpo Policial a “haci un apelacion na e chauffeur di Hit and Run pa presenta na un di e warda di polis. Bo a mira kico a pasa bo por keda anonimo y duna bo informacion ariba nos tipline 11141, nos ta garantisa bo ta keda anonimo.”
Bon Dia Aruba ta manda palabranan di condolencia y forsa na e familiarnan y sernan keri di e persona fayeci.
