Cuerpo di Polis a informa cu ayera dialuna pa 4:40 mainta, central di polis a haya notificacion di un accidente pisa na altura di Nagico na Savaneta entre un auto y brommer.
Nan a informa cu patruya a yega na e sitio di sucedido y a topa cu un situacion basta grave.
E prome patruya cu a yega na e sitio a pidi ambulance cu maximo urgencia, mirando e situacion di e chauffeur di brommer; pero lamentablemente no por a haci nada mas pa e victima.
Pa 5:30am Dr. Texier a constata morto di e hoben Maximilian Thomas A. Hernandez Pinedo naci na Aruba 4 april 2003 ( 20 aña).
Prome rapport cu nan a logra compila ta cu probablemente e Nissan March color blauw numera A-50141 tabata bayendo direccion pariba y tabata pasando un truck di sushi. E brommer Susuki numera MFA-2664 tabata biniendo direccion pabao lo a dal frontal den e Nissan March.
Den e Nissan March tabata tin 4 persona., na unda tur di nan a haya asistencia medico na e sitio mes.
E chauffeur di e Nissan March a keda deteni pa maneha auto bao influencia di alcohol y ademas no tabatin rijbewijs tampoco.
Specialista di Trafico a presenta na e sitio como tambe polis technico pa asina haci nan investigacion.
Na e sitio tambe tabata presente fiscal di Ministerio Publico, Departamento di Slachtofferhulp a presenta pa brinda sosten y ayudo na e famia di e victima den e momento dificil aki.
Tambe altocomisario di polis drs. Ramon Arnhem tambe a bin na e sitio pa e tuma nota di e accidente tragico aki.
Un apelacion di parti Cuerpo Policial Aruba a bay pa chauffeurnan baha velocidad, no bebe y stuur y sigui reglanan den trafico.
Den esaki, diferente reaccion a tuma luga riba rednan social mirando cu e hoben fayecido tabata practica drifting, ademas cu den mayoria di accidentenan manera esaki, alcohol ta hunga un rol importante pa loke comunidad ta cuestiona e hecho di chauffeurnan cu ta bao influencia di alcohol y asina mes ta core auto poniendo e bida di hende den peliger y hasta cu consecuencianan fatal, manera lamentablemente a sucede ayera.
