Accidente fatal cu e-bike den aumento, pero segun expertonan, e berdadero problema ta auto

(NLTimes) – Aña pasa a bende mas bicicleta electrico ‘e-bike’ cu nunca na Hulanda. Na mes momento, e cantidad di accidente fatal cu e-bike a aumenta, particularmente entre esnan di edad avansa. Mientras dokternan a boga pa un helm obligatorio, algun experto a cuestiona si realmente ta e ciclistanan cu ta responsabel pa e accidentenan.

Un total di 229 ciclista a perde nan bida den accidente aña pasa, 24 mas cu na 2019. Di e cantidad total di morto riba bicicleta, 32 porciento tabata core un e-bike. Na 2020, casi tres cuarta parti di accidente di bicicleta fatal a involucra persona mayor di 60 aña di edad.

Mama di Myrthe Boss a fayece fin di 2019 mientras e tabata core su e-bike. “Mita caminda riba rotonde, un auto no a mir’e. El a perde su balans purbando di evita e auto y a dal su cabes riba e stupi. Pa motibo di e seriedad di su herida cerebral, su curason a stop inmediatamente”, Boss a bisa.

Boss, kende su mes ta un neurologo, pa e motibo aki ta insisti riba bisti un helm. “Usa bo cerebro y bisti un helm.”. Segun e, e riesgo di daño cerebral serio lo tabata hopi menos pa su mama si e lo a bisti un helm.

Marcel Aries, un neurologo den ICU di Centro Medico Maastricht, a bisa cu un accidente cu bicicleta por tin consecuencia desastroso. “Den ultimo aña, nos tabatin seis ciclista riba e-bike cu heridanan cerebral serio. Niun di nan a bisti helm. Un cantidad grandi di nan a fayece.”

Asina mes, ‘profesor di ciclismo’ na Universidad di Amsterdam, Marco te Brommelstroet a bisa cu e problema principalmente por wordo haya den trafico di auto. “Ironicamente, nos ta kere cu seguridad riba caminda ta extremadamente importante, pero nos no kier papia tocante esaki si ta nifica haci algo contra e peliger berdadero di seguridad riba caminda: e auto lihe.”

“Core bicicleta no ta inherentemente peligroso. Den cantidad di e casonan, nos ta enfoca riba e victima pero en realidad nos mester aborda e chauffeur y trafico riba caminda prome”, Te Brommelstroet a bisa. E Sindicato di Bicicleta a bisa cu un forma cu por haci esaki ta pa separa ciclista y chauffeur di auto riba caminda, y pa reduci e limite di velocidad den areanan cu poblacion denso. Mayoria di Tweede Kamer ya ta na fabor di e segundo proposicion.