(AP) — Dos avion militar historico a boks y cay abao den un bala di candela durante un show aereo na Dallas, lagando seis persona morto, oficialnan a bisa.
Oficialnan di transporte nacional tabata investigando e causa di e accidente diasabra entre un avion bomber di era di Segundo Guera Mundial y un fighter jet. E accidente a sucede tres aña despues di e accidente di un bomber na Connecticut cu a resulta den siete morto, memey di preocupacion andando tocante e seguridad di shownan aereo involucrando avionnan di guera mas antiguo. E compania doño di e avionnan bulando den e show Wings Over Dallas tabatin otro accidente den su mas di 60 aña di historia.
Trahadornan di emergencia a core yega e sitio na Dallas Executive Airport, como 16km for di downtown di e ciudad. Por a mira restonan di avion den un area cu yerba den perimetro di e aeropuerto.
Hues di Condado Dallas, Clay Jenkins a tweet ayera cu e accidente a cobra seis bida, citando e dokter forense di e condado. Autoridadnan ta continua trabao pa identifica e victimanan, el a bisa. No tabata cla si tabatin herido of fatalidad na tera. Departamento di Bombero di Dallas a bisa Dallas Morning News cu no tabatin reportahenan di herido eynan.
Hunta Nacional di Seguridad den Transport a tuma control di e escena di e accidente, cu polis y bombero local dunando sosten, segun alcalde di Dallas, Eric Johnson a bisa. Administracion Federal di Aviacion tambe ta bay investiga, oficialnan a bisa. E avionnan a dal den otro pa alrededor di 1:20pm, FAA a bisa den un declaracion.
Oficialnan no a specifica cuanto hende tabatin den cada avion, pero Hank Coates, presidente di Commemorative Air Force, e compania doño di e avionnan y cu a prepara e show aereo, a bisa cu un di e avionnan, un bomber B-17 Flying Fortress, tipicamente tin un tripulacion di cuatro of cinco persona. E otro, un P-63 Kingcobra fighter plane tin un solo piloto. Pilotonan boluntario cu a ricibi training ta bula e avionnan, hopi biaha nan ta pilotonan retira.
Varios video riba rednan social a mustra e avion fighter ta bula dal den e bomber, causando cu ambos a crash rapidamente cay abao y lansa un bala grandi di huma y candela.
