(Infobae/Jornal do Brasil) – Mexico – Secretaria di Siguridad Publico di estado Quintana Roo a confirma cu un accidente cu un bus diamars ultimo a costa bida di 12 persona, di cual e mayoria ta turista di exterior. Entre e pasaheronan tin ciudadano Mericano, Suiso, Italiano y Brasileño. Tambe lo tabatin por lo menos 15 herido. Autoridadnan ainda no a divulga nacionalidad di e victimanan. Medionan di comunicacion Brasileño o mientras tanto ta confirma cu no tabatin Brasileño entre e victimanan mortal, pero si tin tres herido.
Causa di e accidente ta parce di tabata un tire cu a rementa, causando cu e chauffeur a perde control y e bus a baha di caminda y bolter. Segun prensa local, e chauffeur lo a huy despues di e accidente.
E vehiculo tabata transporta 31 pasahero y ta pertenece na e empresa Turismo Costa Maya. E grupo a desembarca di un barco crucero di Royal Caribbean y tabata na caminda pa e zona arkeologico di Chaccobén. E barco tabata hancra na Mahahual, na Costa Maya, na Caribe Mexicano.
Secretaria Estatal di Turismo lo ta den contacto permanente cu e oficinanan consular pa yuda den e comunicacion cu e familiarnan di e victima y heridonan, segun un mensahe di gobierno di estado Quintana Roo (peninsula di Yucatan).
