ABV no lo acepta aumento di edad di pensioen sin reduccion di orario

Pa presidente di sindicato di enfermeria y trahadonan di hospital (ABV), Gina Maduro, tin puntonan den e landspakket cu nan ta di acuerdo, y otronan cu nan ta di desacuerdo. Specialmente esunnan cu tin di haci cu e parti di cuido. Pero tambe esun cu ta referi na edad di pension. AVB ta contra di cualkier aumento di edad di pension, sino no bin prome un reduccion riba orario di trabao.

Pa loke ta e hisamento di edad di pension di 65 pa 67 aña, sindicato ABV ta haya cu no por compara Hulanda cu Aruba. Maduro a bisa cu Hulanda pa hopi aña caba esunnan cu ta traha full-time ta 36 ora laboral pa siman nan ta traha. Mientras cu na Aruba ta 40 ora pa siman. Den e sector hotelero ta 45 te hasta 48 ora pa siman.

Maduro ta haya cu e hecho cu e trahadonan na Hulanda ta traha 36 ora pa siman ta permiti cu nan edad di pensioen por a bay te 67 aña, ya cu nan ta traha hopi menos. Si nos ta bay pensa mes di bay subi edad di pensioen te 67 aña, e ta kere nos tin cu traha na Aruba riba un ahustacion di nos orario di trabao. Kiermen nos mester cu baha nos orario actual.

Sigur ABV ta un di e sindicatonan cu lo bay exigi pa baha e orario laboral. Nan posicion firme ta cu tanten cu e orario no lo wordo baha, nan lo para fuerte pa gobierno no subi ni un luna mas, corda aña, nos edad di pension, Maduro a bisa.

Reforma sector di cuido

ABV ta spera cu e parti di e mal interpretacion riba e conseho cu e organo di supervision CFT a haci tocante cortamento di 5 miyon for di AZV, lo wordo coregi pronto.

Maduro a indica cu ABV a firma un carta hunto cu e plataforma den cuido y cu nan a mande diamars ultimo pa Tweede Kamer y tambe pa e carta sigui su rumbo pa conseho di minister di Reino. Nan a pidi pa coregi mas pronto posibel e conseho cu dia 6 di mei ultimo CFT a manda pa conseho di minister di Reino riba cortamento di 5 miyon riba tereno di cuido di salud.

E sindicalista ta haya cu e conseho aki a wordo malinterpreta. E tabata 5 miyon ‘eenmalig’ y el a wordo mal interpreta pa ‘maandelijks.’ E mal interpretacion aki a resulta funesto pa cuido di salud. E hecho aki a haci cu for di 1 di juni ultimo, 5 miyon ta wordo corta te december riba tereno di cuido. ABV ta di acuerdo cu mester bin cu reforma riba tereno di cuido, pero no di e forma aki.

Otro punto cu ABV ta di acuerdo cune tin di haci cu Aruba lo bay tin representacion den Caribische Hervormings Entiteit (CHE), caminda lo tin presencia di un local denter di e tres miembronan di e entidad aki.

Aliansa di cuido regional

Un punto importante ta e proposicion di Hulanda pa bin cu aliansa regional riba dunamento di cuido.

Den esaki ABV tin cosnan cu ta di acuerdo y desacuerdo. Pasobra riba e tereno aki tin cierto desaroyo cu nos pais ta hopi adelanta caba compara cu otro partner den Reino. P’esey nan kier wak con e parti aki di colaboracion of aliansa den Reino ta wordo reparti. “Si ta Corsou ta bay haya tur e parti ey, siendo cu nos a inverti caba,” el a adverti.

El a referi cu gobierno a yega di haci inversion grandi riba Aruba su desaroyo rond di tereno di specialisacion medico, manera Imsan. Nan ta dunando servicio na pashentnan cu antes AZV tabata manda pa Colombia. Pero awor nan ta hayando e cuido na Aruba mes. Igualmente ta e caso di hospital cu ta ofrece cierto cuido cu antes tabata wordo haci na Colombia.

ABV su preocupacion ta cu Aruba a inverti caba riba tereno di cuido specialisa, y nos pais ta hopi adelanta riba e tereno aki. No ta Maduro su intencion di descualifica Corsou, pero e realidad ta cu Aruba ta basta delanta den cierto rama specialisa di cuido.

Otro punto cu ABV como sindicato ta haya positivo, ta e compromiso di Hulanda pa aumenta nos capacidad ICU y tambe expande e parti capacidad di testmento den cuadro di e pandemia di Covid. Pero e facilidad di ekipo di proteccion pa e trahadonan di cuido.

Mirando e ultimo desaroyo, presidente di ABV ta haya positivo cu Aruba lo tin mas espacio pa studia miho e condicionnan di Hulanda, prome cu gobierno lo bay tuma decision.

Igualmente e ta duna espacio pa bin cu mas dialogo y participacion di e diferente sector di nos pais. E ta haya cu tin dialogo y transparencia, unda cu tur hende ta participa. E ta un forma pa gobierno por tin un posicion mas fiho pa atende e diferente puntonan di e lands pakket.