Abuso sexual no kiermen cambio di sexualidad di un mucha

ORANJESTAD – Bon Dia Aruba a entrevista psicologo Robert Leal pa papia tocante e punto cu tin hende ta kere abuso sexual di mucha por tin un influencia di un homber of muhe cu ta pone cu na edad grandi nan por cambia di sexualidad.

Leal ta bisa cu el a yega di confronta cu temanan asina. E ta contesta cu e por tin un influencia, ora cu un persona cu a wordo abusa sexualmente por cambia di sexualidad. Sinembargo, e ta bisa cu ta mas basa riba practica di su cantidad di clientenan.

Den e caso cu el a yega di confronta, e ta bisa cu esaki ta e caso mas den mucha homber cu mucha muhe. Unda principalmente e efecto ta depende di e etapa den cual e abuso a sucede. Entre edad di 10 te cu 14 ‘den locual mi por wak, e tempo ey ta importante’.

Sinembargo, Leal ta bisa cu no ta den tur caso. “Un mucha cu ta wordo abusa sexualmente ta bin cu situacion di homosexualidad, ami ta puntra nan si antes el a cuminsa gusta e mesun sexo, of e tabata gusta e sexo contrario. Anto no tur caso nan ta contesta cu si.”

Segun experiencia di Leal, hopi biaha cu abuso sexual ta tuma luga den e etapa en cuestion, pero un biaha so, esey no necesariamente ta nifica cu e mucha lo bira homosexual, sino ‘e por tin influencia riba un grupo chikito’. Como ehempel, el a menciona e celebro di un adicto: tin hende ta purba cierto substancia y ta bira adicto mesora, pero mayoria di hende no.

Segun Leal ta bisa, e celebro ta funciona otro. E tin influencia dependiendo di structura di e persona. “Nos no por hinca tur hende mesun saco, tur ta otro, pero si algun tin influencia.”

Bon Dia Aruba a puntra Leal si homosexualidad ta nace of bira. Leal a bisa cu esey ta un tema delicado, pero den su experiencia practico den seccion cu confiansa cu el a yega di puntra su clientenan tocante e parti di homosexual, anto ta comparti con for di chikito nan a spierta gustando e mesun sexo.

Aunke e ta remarca cu no tin duda cu e por ta influencia tambe pa cierto persona di influencia di algun cosnan manera television, medionan social of abuso, pero el a yega di nota hende cu ta nace homosexual a base di locual e ta ripara den practica.

Leal a expresa cu den su experiencia clinico, el a haci analisis di pashent. E ta agrega cu e posiblemente un minoria a ‘nace homosexual, y tin mayoria cu ta siña’. Un ehempel cu Leal a bisa ta di un persona sensitivo pa emocion y sensibel pa tur locual ta mara nan; manera artistanan ta persona sensitivo cu tur locual ta duna nan placer por bay cu nan.

Den e parti kinestico, un persona cu emocion, sentimento y contacto fisico. Tur locual cu a sinti e movecion. “Si un hende muhe ta mishi cu bo anto e ta sinti dushi, ta e concepto di placer. E ta bay pa placer cu otro hende muhe tin pa su mesun sexo, pero tin cu no ta sinti nada. Por ta cu e persona ta cay den e grupo di ta extremadamente sensitivo.”

Un persona cu ta sensitivo, segun Leal ta bisa cu pa e motibo aki tin hopi persona cu ta bisexual, ‘e ta mas normal di locual hende ta pensa’. E ta bisa cu nan ta consciente cu hende no ta bay husga nan. El a remarca cu nan gusta ta cu hende y no ta mara nan na un sistema di creencia pa locual nan mester ta supuestamente.

Leal ta bisa cu e por tum’e den e sentido ey, pero den su experiencia clinico, tin hende cu ta nace homosexual. Tambe el a yega di wak cu tin hende muhe cu ta atrapa den curpa di homber y vice versa. E ta bisa cu e ta tecla cu mester primi pa sa con pa drenta den e preguntanan pa saca informacion dilanti, asina por yuda e persona.

Sinembargo Leal ta bisa cu ta straño pa pidi un persona pa no ta homosexual. Tin caso e ta bisa tambe den su 38 aña experiencia cu tin hende por haya e sentimento na algun momento, esey ta pa esunnan cu no a nace cune pero ta cuminsa sinti.

Tin hende homber cu a cuminsa gusta hende despues cu tabata cu homber. E ta continua splica cu e persona ta drenta den un confusion. Pa motibo cu e gusta hende homber y no sa kico nan por haci. “Nan ta bin cerca mi. Mi ta mantene trankil y puntra nan kico nan kier, si ta homosexual of heterosexual ta locual nan kier, pa pasa y lag’e sosode.”

Sr. Leal ta bisa cu den nan confusion, e trabou terapeutico ta pa e tension cu ta mara den nan proceso mental por los. “Asina ta facil pa tuma decision. Esaki cos biokimico ta sosode. E no ta bin di su mes, algo ta sosodiendo cu algun hormoon di nan. E confusion ta locual mester kita.”

Algo cu Leal ta bisa cu semper persona y profesional mester keda mente habri pa tur sorto di situacion. E ta agrega cu cada persona tin nan pensamento, pero den area profesional mester keda obhetivo y haci bon trabou. Sea e persona su preferencia sexual.

Den e parti ey ta algo cu e ta haya hende por faya hopi di parti sexualidad den area profesional. “Tin algun persona cu ta homosexual cu ta sinti nan mes cera, y no mester ataca nan. Tambe tin pareha di mesun sexo cu tin nan mesun problema, mescos pareha di diferente sexo.”

Segun Leal ta bisa cu ta bunita descubri esey den e practica, cualkier persona a base di nan sexualidad tin problema mescos, agregando cu si ‘tin otro problema cu diferente frecuencia’. E ta remarca cu tin tur cos cu por haya na Aruba, pero hopi hende ta scondi of tin miedo, pero tur e combinacion ey el a wak den su practica.