Despues di un aña di nan gran manifestacion, fundacion Lisette Gomes: Stop Abuso Sexual di Mucha ta para keto bay mesun caminda. E fundacion ta bay reuni cu e gobernador nobo pronto pa ser conoci y wak den ki otro forma por continua na enfrenta e problema di abuso di mucha riba nos isla.
Miembro di e fundacion Rebecca Maduro ta conta nos cu nan a sinta cu gobernador anterior Fredis Refunjol aña pasa den luna di juni. Esaki despues di nan gran manifestacion di aña pasa april. Nan a reuni cu gobernador anterior tocante kico tur ta andando, kico e fundacion ta haci, a sinta cu parlamento anto haya hopi informacion cu ya caba tabata conoci. “Tabata tin cosnan di rapportnan treci dilanti cu nos tabata sa caba. Pero bo ta sinti cu pa parlamento nan a tendi esaki pa prome biaha. Y ta trata di cosnan cu a wordo regla den Reino, pues eynan toch bo ta wak cu nan ta purba di acomoda e fundacion pa mantene nos contento y haci como si fuera hopi trabao a wordo haci. En realidad for di parti di parlamento y gobierno bo ta mira cu ta purba di tene nos contento y keto.”
E fundacion ta subraya cu eynan ta bin e parti caminda cu e gobernador tambe tin su funcion di controla kico ta pasa den gobierno, cu nan ta cumpli cu nan afspraak y haci nan trabaonan debidamente.
Niun progreso
Aña pasa e fundacion a entrega un manifiesto na gobierno. Nan a wordo atendi den corto tempo door di parlamento y minister di Husticia. Lisette Gomes: “Pero despues di esey, e tabata un reunion hopi decepcionante, specialmente esun di parlamento. Nos a literalmente haya un rapport cu nos a haya na 2010 caba pues nan a djis cambia e fecha y algun posicion. Pasobra minister Paul Croes tabata dirigi e comision special ey cu a lanta. Y nada no a cambia, nos a mira cu tur cos a keda mesun cos.” Locual cu e fundacion a boga pe no ta wordo papia di dje mas te cu awe.
Meldcode
E fundacion ta haya lastima cu ainda despues di tanto aña di a entrega manifiesto cu casi mesun puntonan di esun cu a wordo entrega aña pasa, mayornan mester cana caminda di cruz pa haya debido atencion pa nan caso. E puntonan cu e fundacion a trece pa dilanti entre otro ta introduccion di un Meldcode.
Esaki ta un plan/code na unda e proceso di ayudo ta wordo exactamente describi ki ora, y con un profesional tin cu haci ora cu un persona tin sospecho of ta kere firmemente cu un mucha a wordo abusa di dje fisicamente. Manera nos a yega di publica caba, e plan aki ta encera:
- Señalamento di e problema
2. Comunicacion entre diferente instancianan/intercambio di informacion tocante di e caso/nan.
3. Combersacion cu e victima/cliente
4. Midimento di e riesgo pa ripiticion, e tipo di gravedad di e maltrato/abuso
5. Coordinacion di e pasonan pa tuma huridicamente, socialmente, y e parti di salud mental y fisico di e mucha.
6. E fase di e tumamento di decision rapido cu unico metanan: proteccion y cuido di e mucha abusa, e detencion di e sospechoso, y e opvang di esunnan afecta.
Manifiesto na Ministerio Publico
Ta di suma importancia segun e fundacion, pa tambe delinea den e proceso pa cada situacion con largo e parti di investigacion policial/hudicial, e proceso medico y proceso di ayudo emocional/social/psicologico mester dura. E fundacion a constata cu tur e areanan ariba menciona na e momentonan aki no ta funcionando. Dos luna pasa e fundacion a entrega un otro manifiesto pero e biaha aki na Ministerio Publico. “Nos ta preocupa con e casonan ta wordo trata. Pa motibo cu nos ta haya hopi caso unda hende ta entrega keho pero nan no ta yega Ministerio Publico. Of si nan yega mes, nan no ta yega corte. Awe nos ta mas cu dos luna despues di e manifiesto ey tambe. Pues ami ta saca mi conclusion cu e tema aki ta wordo ignora y no kier wordo toca mes. Mi no sa dicon of kico e problema ta, pero e casonan no ta birando menos na Aruba”, sra Gomes ta comenta.
Depende na politica
Nos ta den aña di eleccion anto e fundacion sa cu nan no ta bay haya mucho atencion e aña aki mas. Sra. Gomes: “Na final di dia nos ta depende na politica pasobra parlamento ta esun cu ta bin cu e cambionan necesario. Nan ta e principal akinan. Si Jeugd & Zeden Politie tin suficiente material of personal, ami no ta na altura di dje. Pero si nos ta hayando hopi keho riba e falta di esaki. Hopi caso tambe ta yega caminda Ministerio Publico no ta actuando manera mester ta y casonan cu ta yega corte no ta haya e castigo necesario pa e victima, su famia of comunidad. Pasobra con cu bay bin, esey ta haci un diferencia. Manera nos por wak cierto caso ta wordo midi na cierto manera. Nos muchanan ta esunnan cu ta keda hopi perhudica na Aruba.”
