ORANJESTAD – Abuso sexual di mucha a tuma luga na Aruba desde hopi tempo pasa. E cifranan pa cada biaha ta aumenta y autoridadnan a laga un amargo sabor den e comunidad, cu e castigo cu algun di nan a haya ora nan ta acusa di haci e crimen, aunke esey ta e ley.
Abuso sexual di mucha ta un problema social grandi cu ta afecta e personanan mas fragil, e infancia di e mucha. Sociedad mester vigila pa e integridad di e muchanan, asina tambe di protege nan contra tur tipo di abuso.
E comunidad por considera cu e abuso sexual ta un problema social, cu te ainda no a ser considera como esey, pa motibo cu te ainda por pensa cu esaki no lo por pasa cu algun familiar cercano of den un ambiente cu ta basta leu di su realidad. E comunidad mester kibra e tabu cu hopi biaha ta considera como un scandal social, y esey ta impedi su reconocimento.
Di mesun manera, e opinion di mucha hopi biaha no ta wordo considera como valido den sociedad, salubridad y e mas importante, e sistema hudicial, unda e aspecto di contesta y atencion cu nan ta duna pa e victima te ainda ta afecta seriamente e muchanan.
Dianan pasa, comunidad a conoce otro caso di abuso sexual di un mucha muhe di 12 aña, supuestamente di parti un persona cu tabata traha como chauffeur di bus hunto cu su tata. Sr. Arendsz, tata di e mucha muhe, a haci e denuncia december ultimo, pero e no a haya ni un contesta di parti di autoridadnan.
Arendsz a dicidi di no biba mas cu e impotencia y preocupacion cu e suceso aki a causa pa su famia y su yiu muhe. Ministerio Publico, mediante di su vocero Ann Angela, a splica Bon Dia Aruba cu e sospechoso a keda liber pa motibo cu Ministerio Publico no tin e pruebanan suficiente pa laga e sospechoso deteni.
Tambe el a splica cu e investigacion ta sigui riba denuncia di un hecho castigabel, e enfoke ta riba sospechoso y riba acumula pruebanan den e caso.
Bon Dia Aruba a acerca e trahadonan di bus cu ta cubri e ruta di Playa-San Nicolas pa haci un par di preguntanan tocante e suceso aki, pero nan no kier duna un declaracion. Un chauffeur cu no a bisa su nomber, a expresa cu: “Nos no por bisa nada di e caso ey, pasobra e caso ta hopi delicado”.
