Mervin Wyatt-Ras a anuncia cu diabierna den Comision Central lo trata e rapport encuanto abuso sexual di menor. Esaki ta a base di e manifesto cu a ser entrega na Parlamento dia 27 di april 2016. En bista na anja 2010 Parlamento ya caba a compila un rapport encuanto di abuso di mucha, a evalua ki puntonan di e rapport lo (no) a ser ehecuta. Pesey mes a dicidi di invita tres minister pa reunion, esta di Asuntonan Social, Salud y di Justicia.
Bon Dia Aruba a ricibi un comunicado pa locual ta e asunto di abuso sexual di mucha y segun esaki, Parlamentario Mervin Wyatt – Ras diabierna 24 di Juni ta spera di aproba un rapport cu a ser entrega na Parlamento pa wordo trata den reunion di Comision Central.
Akinan por lesa e comunicado:
E rapport aki a keda trata den reunion di comision di Asuntonan Social y Salubridad dia 26 di mei. A ricibi comentario di diferente Parlamentario y griffier a trese cambio den e rapport cu na su turno a ser entrega na Parlamento pa ser trata den reunion di Comision Central. Por a tuma nota cu e ta gescheduled pa diabierna awor dia 24 di juni y Parlamentario Wyatt-Ras ta spera cu aproba esaki y mand’e pa gobierno ehecuta e puntonan cu ta rekeri esaki. A base di pregunta haci dor di prensa encuanto e hecho cu e fundacion Lisette Gomez a aserca Unicef, y cu gobierno ni Parlamento ta haci nada pa cu abuso di mucha Wyatt-Ras a reacciona cu esaki ta keda na cada ken pa haci kico nan ke. E asunto di abuso di mucha no ta for di awor sino desde anja 1990 unda cu profesionalnan mes, bao di cual Wyatt-Ras mes a lanta pa yega na diferente formanan pa trata cu victimanan di abuso sexual. A lanta fundacion Respeta Mi y a lanta buro Sostenemi na 2004. Alavez a cambia e Codigo Penal na dos occasion, entre otro a hisa castigonan, a introduci boet, y mas hopi hende a ser protehi entre otro esnan cu un handicap, esnan cu ta fuera di conciencia, hende muher den matriomonio. E problema grandi ta cu fundacionnan, organisacionnan, departamentonan no ta traha hunto. Aki mester bin cambio. Envez di punta dede riba Parlamento y Gobierno mester traha hunto tambe pa yega na mihor output. Pues tur profesional y gobierno cu Parlamento mester traha den un solo direccion pa yega na un mihor output. Unicef mes a haci un sondeo na Aruba unda a yega na diferente recomendacionnan cu gobierno ta ehecutando. Unicef a yega di bishita Aruba pa evalua e plan di accion di gobierno pa loke ta trata maneho integral ariba tereno di hubentud.
