Presidente saliente di Kiwanis Circle K, e hoben Lorenzo Dirkzs a declara na Bon Dia Aruba cu nan ta un club di hobennan pa muchanan y hobennan di Aruba.
Nan ta studiantenan di EPI cu kier forma parti di e solucion, ya cu tin hopi cos pa haci na Aruba specialmente riba e tereno social. “Tin hopi persona den necesidad y instancianan den necesidad”, asina e hoben Dirkzs a bisa.
Kiwanis Circle K
E club aki ta relativamente jong manera su miembronan. E club a nace tres aña pasa pa asina su miembronan hubenil di forma boluntario lo traha na bienestar di nos comunidad. “Nos ta studiantenan motiva pa duna bek na comunidad di Aruba”, el a declara na Bon Dia Aruba.
Como hoben comprometi pa e bienestar di nos muchanan, Lorenzo Dirkzs ta haya cu e problema di denuncia di abuso sexual contra menor di edad, y casonan di pedofilia den nos comunidad, ta un “problema hopi peligroso actualmente ariba e isla”.
E ta considera cu e tema aki ultimamente ta wordo denuncia den medionan di comunicacion y e ta un tema hopi hot. E ta haya cu e ta keda na diferente instancia pa haya sosten di entre otro gobierno pa por ehecuta trabou necesario di con pa deal cu e muchanan aki.
“Mi ta kere cu na Aruba realmente tin un falta di sosten den e parti di asuntonan social”, segun Lorenzo Dirkzs.
E ta argumenta cu hopi biaha pa ehempel ora cu muchanan ta pasa dor di un problema asina, no tin un di dos fase. Esta con nos ta bay drecha e situacion of con nos ta bay mehora e situacion ya sea cu un persona, un trahado social y/of un psicologo, y e ta haya cu e aspecto aki falta hopi ainda na Aruba.
Proyectonan
El a bisa cu como club nan ta asisti pa haci proyectonan pa pone atencion riba e victimanan di e tipo di abuso asina, y esaki ta un contribucion cu nan ta dunando pa ta parti di e solucion. Pero e tin cu bisa si cu departamento di Asunto Social hunto cu gobierno ta esun cu mester duna mas di nan banda pa mehora e situacion aki.
Nan ta bou e mesun capa protector di Kiwanis Club Aruba cu ta e organisacion di adulto. Nan ta e hala hubenil di e club aki y nan miembronan ta studiantenan di EPI.
E club aki nan enfoke ta e muchanan di nos comunidad. Nan ta organisa proyectonan cu e fundacion Casa Cuna Progreso, caminda nan ta organisa actividad recreativo pa e muchanan. “E meta principal di nos ta pa pone tur mucha, no ta importa unda bo a nace, con bo forma ta di biba, nos kier pone bo sinti igual cu tur otro mucha aki na Aruba”, el a bisa. Tambe nan ta colabora cu Imeldahof, Club Sonrisa, etc… y for di e instancia aki nan ta haya informacion tambe riba con nan por canalisa nan ayudo of ken nan por yuda.
Anualmente tambe nan ta bishita e diferente cas y organisa actividad pa e muchanan den diferente varios rond di nos isla y asina nan ta traha nan proyecto comunitario.
