Feria Social (JO) (2).JPG

Fundacion pa Hende Muhe den Dificultad ta sumamente contento di a bolbe ricibi sosten for di Feria Social e aña aki cual a aporta den nan campaña di conscientisacion pa trece mas luz riba e tema di abuso domestico, sexual y emocional di hende muhe na Aruba cual segun e fundacion ta sosode hopi mas frecuente di locual comunidad ta kere.

”Na aña 2016, na e momentonan aki tin un muhe cu ta wordo maltrata eyfo anto e por ta den posicion di mas halto te cu di mas abao,” coordinador di FHMDD Magaly Maduro ta bisa. Desde 2011 segun FHMDD ta mustra constantemente mas o menos un15 caso di abuso domestico pa aña anto pa e aña aki ya caba tin 16 caso registra na e shelter anto e aña no a cera ainda. ”Sin duda algun e casonan ta hopi mas frecuente cu locual hende ta pensa pasobra fuera di e casonan serio registra cerca nos na shelter, nos ta haya bishita tur siman di diferente hende cu ta acudi cerca nos pa busca informacion y conseho,” sra. Maduro ta splica Bon Dia Aruba.

 

Diferente biaha e fundacion te hasta no ta tende nada mas di cierto victimanan despues cu nan ta sali for di hospital of djis nan no ta mira nan acudi mas cerca nan pa algun motibo of otro. Fundacion Hende Muhe den Dificultad ta trahando duro riba nan campaña di conscientisacion pa motibo cu entre otro ta haci hopi falta di esaki na Aruba riba e tema di abuso y no por soluciona problema si ta laga nan scondi.

Videonan pa conscientisa y hala atencion

E idea entre otro tabata pa traha dos video di conscientisacion anto hunto cu e concepto nobo cu fundacion CEDE a bini cun’e e aña aki den Feria Social cual ta e ‘youth coach’, a busca sr. Gregory J.C. Bronswinkel di BA-Caribbean kende den su luga a bay busca studiantenan cu por a haci e proyecto aki bira realidad pa FHMMD. E hobennan boluntario mes a bin cu e ideanan na con por yuda e fundacion di e miho manera pa trata cu un tema cu ta poco dificil pa haci algo leuk di dje.

 

”Naturalmente e mester a bay over di dificultadnan di hende muhe anto den e caso aki specificamente e maltrato fisico. A enfatisa riba abuso emocional y fisico pasobra esakinan ta hopi biaha cana paralel cu otro,” sra. Magaly ta conta Bon Dia Aruba.

 

Recreacion di casonan di abuso no ta tarea facil

Cada fundacion cu a participa den Feria Social 2016 a kies nan mesun proyecto cual a varia den trabao. Cu un total di 15 fundacion y 13 sponsor unda cu 202.500 florin a wordo colecta pa realisa diferente proyectonan manera renobacion y diferente proyectonan unico manera den e caso aki esun di FHMDD.

 

Sr. Bronswinkel hunto cu un total di 6 hoben boluntario tabata tin e tarea pa recrea casonan di violencia domestico cu intencion di conscientisacion. A aporta tambe den traha un presentacion di e tarea di FHMDD hunto cu un modernisacion completo di e flyernan y materia. Sin embargo e tarea di mas dificil tabata pa recrea situacionnan fastioso den casonan domestico pa asina causa un tipo di impacto den comunidad pa cuminsa presta atencion riba e tema aki.

 

”E tabata hopi educacional y mi a siña specialmente hopi trahando cu e hubentud riba nan punto di bista, creatividad y capacidad cu nan tin. E ta poco dificil pa haci algo ‘leuk’ di un tema asina serio manera esaki mirando e cantidad di casonan cu ta pasa y nos ta spera cu e proyecto aki yuda den e proceso di conscientisacion pa trece un paro na abuso domestico,” sr. Bronswinkel ta bisa Bon Dia Aruba. Pronto comunidad di Aruba ta bay mira esakinan y seguramente lo tende hopi mas di FHMDD kende lo sigui pusha pa yuda bringa y stop abuso domestico na Aruba.