Segun cabesante di St. Aloysius School, Sr. Vladimir de Cuba, mester pone atencion riba e parti di abuso di mucha na Aruba pasobra ta papiando di un daño permanente na un parti di nos futuro generacion cu aki 10 aña ta bay ta adulto. Un generacion cu no a soluciona su traumanan apropiadamente lo por trece hopi problema den sociedad.
”Semper tin caminda pa mehora y akinan na Aruba tin hopi caminda pa drecha. Esey no kemen cu tur ora cos ta bay malo, tin casonan cu a cana bon y a bin solucion faborabel cu e situacion di e famia y di e mucha a drecha tambe. No mester wak e cosnan cu a bay robes so, tin mester tene cuenta di esunnan cu a bay bon tambe . Sr. de Cuba ta comenta.
Sr. de Cuba ta comenta cu sinembargo ta un echo si cu na Aruba bo ta tende hopi biaha cu pa entre otro motibo financiero of falta di personal di cierto instancianan, cu no tin personal disponibel y nan ta keda hopi limita pa locual ta personal profesional pa por enfrenta tur e casonan cu nan ta haya. ”Mi no ta kere esaki ta un mentira mi ta kere e ta un berdad pero e ora e instancia of departamentonan concerni mester percura con cu bay bin pa tin suficiente personal y bon cualifica pa por enfrenta e casonan aki” Sr. de Cuba ta splica Bon Dia. ”Mi ta asumi cu e cantidad di kehonan mester a crece y mi ta kere esey ta atribui no pasobra cu el a bira mas hopi, pero pasobra cu awo hende ta tribi un tiki mas pa papia. ” Sr. de Cuba ta bisa. Segun Sr. de Cuba, abuso fisico y abuso sexual ta un cos cu na Aruba ta hopi ‘Taboe’ te ainda sinembargo pa papia di dje y ta supone cu tin di haber tambe cu Aruba ta un isla chikito y ora cosnan sali, no pa critica prensa, pero prensa ta lubida tin biaha cu ta e mucha ta esun central anto ora bo publica cosnan asina, con cu bay bin hende ta bay haya sa cu ta tal famia, scol of tal bario e ta. ”Esey nos mester purba sinembargo pa cuida e privacidad y e siguridad di e mucha pasobra con cu bay bini, mañan e ta keda un parti di nos comunidad” Sr. de Cuba ta bisa.
Segun Sr. de Cuba e ta kere cu mester duna e instancianan concerni e espacio pa cana pa por haci investigacion debidamente si y pa saca afo di berdad ta kico ta e echonan rond di loke a pasa. ”Cu esaki ta sosode na Aruba no ta un secreto, tur hende sa cu e ta pasa anto e ta keda hopi biaha na con e famia nan mes ta deal cun’e. Den mi opinion, si e pasa bo mester entrega un keho y tuma accion pasobra e mucha ta wordo daña pa e resto di su bida. E consecuencianan emocional ta keda cu herida cu ta dificil pa cura anto mi ta di opinion cu mester tuma medida” ,Sr. de Cuba ta splica.
Tarea primordial di scol ta pa asisti tur e muchanan
Sr. de Cuba ta agrega cu ta bisa e mayornan den anochi informativo cu si nan ta nota cosnan cu no ta cuadra, nan ta duna conocemento na e instancia y papia cu e mayornan. ”Tabata tin caso caminda mester a informa instancia y mayornan no ta keda mucho contento cu esey como scol nan ta culpa bo di a daña of trauma famia siendo cu esey no ta e caso. Nos intencion ta pa percura pa e muchanan haya educacion y enseñansa pues nos ta asisti e mayornan den e parti di educacion, pero nos ta zorg tambe pa e sinti su mes sigur pasobra si e no ta sinti su mes bon of cu nos ta mira cu algo ta menasando su siguridad y su bienestar general, ta nos deber di boga pa e mucha” , Sr. de Cuba a bisa.
