(NLTimes) – Hulanda tin mester di miho ley y regulacion pa proteha mascotanan for di personanan cu ta abusa di bestia, segun partido derechista di e coalicion VVD y e partido izkierdista PvdD.
Parlamentarionan Erik Havekort di VVD y Frank Wassenberg di e partido di bestia kier prohibi abusadornan di bestia di tin mascota, prohibi e benta di bestianan cria specificamente pa benta na Hulanda y encurasha personanan pa pone chip den nan pushi, De Telegraaf a reporta.
Animal Abuse Act ta declara cu un persona por keda prohibi di tin mascota pa varios aña si nnan ser acusa y sentencia pa abuso di bestia. “Sinembargo nos ta bisa; den casonan extremo, nos ta haci esaki un prohibicion pa henter nan bida,” Wassenberg a bisa na e corant. “Tin ehempel di abusadornan di bestia cu ta maltrata decenas di bestia y simplemente ta bolbe haci esaki despues di paga un boet. Nos tin cu lucha contra e exceso aki.”
Parlamentarionan kier lucha contra e bestianan cu ta ser cria excesivamente pa benta. Hulanda ya caba a pone reglanan estricto pa cria cachonan y pushinan pa tin caracteristicanan specifico, manera un nanishi mas cortico. “Sinembargo trece bestianan for di afo pa bende y cria te ainda ta permiti. Esaki tambe mester keda preveni,” e parlamentarionan a bisa. Belgica ya caba ta un forsa den regulacion, Wassenberg a señala.
Wassenberg y Havekort tambe kier pa gobierno tuma accion pa pone chip den pushinan en masse pa asina e bestianan perdi por ser haya cu mas facilidad. “Tur hende cu tin un mascota sa con teribel e por ta ora cu bo mascota perde,” Havekort a comenta. Nan no kier haci esaki obligatorio necesariamente. Algun municipalidad tin areglo pa e personanan cu no por cubri e gasto di un chip. “E tipo di plannan aki por ta un solucion,” Wassenberg a expresa.
