Segun director di Banco di Seguro Social (SVb) sr. Edwin Jacobs, sector publico ta keda un preocupacion pa loke ta trata absentismo laboral. Nan ta mantene datonan na dos nivel den e sector aki. Di un banda nan ta inclui e sector enseñansa y di otro banda nan ta exclui e sector enseñansa tambe pa asina SVb por mira kico ta e efecto di e cuerpo di empleado publico su so; y enseñansa su so riba tereno di absentismo laboral.
Si nos ta tuma nota di e sector publico excluyendo enseñansa e porcentahe di absentismo ta di 8.53%. Na sector priva e tabata 2.67% (riba e grafico nos por compara e diferencia). Si nos ta inclui enseñansa den e sector publico e porcentahe ta baha te na 7.01% . Esaki ta un indicacion cu den e sector di enseñansa e absentismo promedio ta 4.1%, kiermen e ta hopi mas abou cas mita di loke ta den e sector publico.
Sr. Jacobs ta confirma cu e “docentenan tin un AO di 4.1% cu ta relativamente bou”, compara cu e otro departamentonan cu ta forma parti di e sector publico. Te hasta nos sector di enseñansa ta registra un indice di absentismo laboral mas abou cu otro paisnan mas desaroya, segun sr. Jacobs.
Notificacion AO
Si nos ta compara e notificacion di AO den e sector priva ta 1.1 biaha pa trahado promedio; y den sector publico e ta casi 5.8 biaha cu nan ta notifica AO. Si ta wordo inclui e sector di enseñansa den e indicacion aki e ta bira 4.95 biaha, pues e ta baha un tiki.
“Den e sector di enseñansa e promedio di notificacion di AO ta 3.25”, el a informa. Pues e ta hopi mas abou cu sector publico.
Encuanto e promedio di e dianan di AO, den e sector publico ta mas abou cu den e sector priva. Esaki dor di cu den e sector priva bo tin hopi dia di AO cortico, ya cu gran parti ta dos dia practicamente, ya cu e siguiente dia nan mester bin controla y despues nan ta bay AO bek. E ta 5.69 dia pa trahado di sector publico. Si ta wordo inclui enseñansa e ta 5.6. Den e sector di enseñansa so e dia ta 5.3, pues no tin mucho diferencia cu e resto di e sector publico.
Haciendo un comparacion e cifranan di e sector publico -sin enseñansa- durante e ultimo 5 aña, e ta practicamente un tiki menos di e promedio. El a haya un tiki di mehoracion riba promedio di dia AO solamente. “Esey ta un tiki y unico mehoracion den e promedio di 5 aña”, segun director di SVb.
Sr. Edwin Jacobs a conclui bisando cu ta keda un preocupacion den e sector publico, y SVb ta kere cu e problema mester wordo atendi na nivel di hefenan di departamento, y mas miho compromiso pa cu atencion di un procedura di absentismo.
