Director di Banco di Seguro Social (SVb) sr. Edwin Jacobs a indica cu ora cu nan ta atende cu absentismo laboral, SVb ta uza tres indicador pa evalua y monitor absentismo den e dos sectornan, esta sector publico y sector priva.
Un di e indicador ta e frecuencia promedio di notificacion di AO. E di dos ta e promedio di duracion di AO y e di tres ta e porcentahe di absentismo laboral. E ta splica cu e porcentahe di absentismo laboral ta esun cu ta bisa bo pa ehempel di 100 dia di trabou cuanto no a wordo traha pa motibo cu e persona tabata incapacita pa traha.
Teniendo cuenta cu e indicadornan aki, director di SVb a declara na Bon Dia Aruba cu den e sector priva e absentismo laboral ta kedando den e mesun direccion compara cu aña 2014. Na 2015 e sector aki tabatin un porcentahe di absentismo di 2.67%. Kiermen di cada 100 dia di trabou 2.67 no por a traha pa motibo di incapacidad laboral. Esaki ta logicamente pa e grupo sigura pa seguro di malesa cu ta esun cu ta yega te 54.600 florin anual di entrada.
Notificacion AO sector priva
Pa loke ta trata e promedio di notificacion di AO den sector priva, e ta 1.13, kedando semper den e margennan. Y e promedio di duracion di AO tabata di 9.28 dia. Sr. Jacobs a señala cu si nos ta compara e datonan aki cu e cifranan di e ultimo 5 añanan, nos por mira cu practicamente tur e indicadonan -cu excepcion di cantidad di dia promedio di AO- tur tabata bou di e promedio. Kiermen 2015 no a mustra un tendencia preocupante compara cu e ultimo lustro riba tereno di absentismo laboral pa e sector priva.
Ta resalta tambe cu den e sector priva e absentismo laboral ainda ta keda bou di locual internacionalmente ta wordo experimenta. Ya cu den otro paisnan e ta un promedio mas halto cu un 3%. “Cerca nos e ta bou di un 3% kedando den un margen hopi bon. Aunke el a aumenta un tiki compara cu 2014”, el a bisa. Esaki debi cu na aña 2014 a wordo registra un record absoluto di absentismo laboral.
