Pago segun productividad y un areglo di pago di absentismo manera con sector priva ta regl’e. Esey ta djis un di e formanan cu Gobierno por baha gasto di personal, segun Conseho Social Economico, SER. Particularmente mirando cu na AO so, Gobierno ta paga casi 63 miyon florin.

SER a formula un serie di conseho con Gobierno por baha gasto publico y e maneho di compensacion pa su personal ta un di e aspectonan mas crucial y necesario, particularmente pa motibo di e crisis financiero/economico di COVID-19.

AO

Un trahado den sector cu despues di cuater dia di ta ausente di trabou pa motibo di malesa ta cobra 80 porciento di su salario. Despues di dos aña, pa motibo di a keda ausente pa e mesun malesa, e ciudadano no ta ricibi pago mas. Den sector publico y instancianan semi publico, e condicion pa trahadonan ta mucho miho, cu un areglo mucho mas costoso.

Ambtenaarnan y otronan cu mesun posicion, ta ricibi 100 porciento di nan salario den e prome dos añanan di ta ausente pa motibo di malesa. Den e di tres aña e pago ta 90 porciento y despues e pago ta di 80 porciento. Te despues lo bin un reevaluacion (herkeuring). Na 2018, e porcentahe di absentismo tabata di 8.6 porciento cu a costa Gobierno 62.8 miyon florin. E cambio, absentismo den sector priva pa e mesun aña tabata 2.9 porciento cu ta hopi mas abou cu locual ta registra den sector publico, y a costa 32.8 miyon florin.

E ta hopi cla cu e areglo pa absentismo den Gobierno ta costa hopi y tin teorianan cu ta bisa cu e areglo por hasta promove absentismo. Sinembargo, aunke cu SER no tin data concreto pa saca un conclusion asina, y ta pa motibo ey mes ta kere cu Gobierno mester haci un investigacion riba e nivel halto di absentismo y adapta y/of desaroya su maneho y medidanan cu e meta pa baha e gasto halto aki. SER ta conseha pa revisa e areglo mes, esta di paga 100 porciento pa e prome dos añanan, 90 y 80 porciento te despues di algun aña, den cuadro di reduccion di gasto. Mas ainda mester adapta esaki den tal forma cu ta minimalisa e discrepancia cu sector priva.

Gastonan pa limpiesa

Gobierno tin por lo menos uno of dos persona emplea den casi tur servicio, direccion y bureau encarga cu limpiesa. Pa April 1, 2020 tabatin 251 persona encarga cu limpiesa den servicio publico. Gobierno a paga 692.774,73 florin na salario pa e grupo di trahadonan aki. SER ta considera esaki un suma substancial y como tal ta kere cu mester evalua si no ta mas barata pa pasa e trabou di haci oficinanan limpi pa e diferente companianan di limpiesa na Aruba.

Si Gobierno duna contratonan a termino largo cu e companianan aki, lo por negocia tambe pa e esakinan tuma e trahadonan den servicio publico como nan empleado, siguiendo e principio ‘hende ta sigui e trabou.’

Pago segun prestacion y sistema di evaluacion structura

SER ta señala cu casi ningun servicio, direccion di administracion publico ta mantene un trayecto di evaluacion structura, y mara na dje, un compensacion basa riba prestacion. E hecho cu falta e structura aki, ta contribui na arbitrahe ora ta trata aumento di salario, cu den e idioma di ambtenaar ta keda traduci na ‘bevordering.’ E falta di e structura aki y compensacion segun prestacion no ta yuda e productividad denter di e aparato publico. Gobierno mester promove pa basa e compensacion di su personal riba un trayecto di evaluacion unda e productividad di e trahado ta e aspecto primordial.

Uso toelage basa riba articulo 25 di LMA

SER ta bisa cu tin hopi señalnan cu ta haci demasiado uso y crecemento sin control di diferente ‘toelage’ denter di Gobierno. Particularmente ta referi na articulo 25 di e Landsverordening Materieel Ambtenaren, LMA, unda bou cierto circunstancia empleadonan por haya un suplemento (toeslag) di 25 porciento di nan salario. Segun e maneho actual, ta haci uso di articulo 25 di e LMA na tres grupo di trahadonan publico, cu ta: Directornan, hefenan di servicio y di bureau; ambtenaarnan cu ta na disposicion di bureau di Minister of Secretariado di Conseho di Minister; ambtenaarnan cu un funcion di un balor special of cu un specialidad, por ehempel un suplemento den cuadro di siguridad y falta di experticio.

SER ta opina cu mester actua hopi restrictivo cu otorgamento di toeslagen basa riba articulo 25 di LMA.

Personal na Ministerionan

Segun añanan a pasa, el a bira un custumber cu cada Minister ta nombra su propio personal, cu e mes ta scoge y apunta pa por traha na su ministerio, pa e duracion di su funcion. E trahadonan aki, ta conoci den comunidad como ‘coordinadornan.’ Nan ta pa mayoria caso, personanan di confianza, en particular sostenedonan politico, di e Minister en cuestion. E asina yama coordinadonan ta gana hopi mas cu nan trabou anterior tabata paga nan pa motibo di entre otro uso di articulo 25 di LMA, cu ta e toeslagen of hasta compensacion politico pa motibo cu nan ta mara politicamente na e Minister en cuestion.

SER ta propone pa busca forma pa mira con pa cataloga e grupo di trahado aki como trahado fiho di forma cu no mester paga e suplemento,esta e toelage. Ta referi aki particularmente na personal cu ta sostene e trabou y ta den administracion, y cu no ta forma parti di e proceso di delinea maneho hunto cu e Minister. E Minister lo por recluta personanan cu experticio pa conseho y desaroyo di maneho, cu alabes por ta personanan di confianza.

Den luz di e sugerencianan aki lo por limita e uso di articulo 25 di LMA na personanan cu experticio limita. Es mas, lo mester evalua aplicacion di articulo 25 pa personal specialisa den e sector publico, pasobra por sali di e punto di bista cu ambtenaarnan cu ta na disposicion di e Minister of Secretariado di Conseho di Minister ta haci e trabou segun nan nivel di estudio, conocemento y experticio. E trahadonan aki ta cay den un nivel di compensacion cu ta tene e tres factornan aki na cuenta caba. Pues pa SER, e no ta splica pakico nan lo mester ricibi un toeslag adicional di 25 porciento di nan salario, basa riba articulo 25 di LMA. Si mester analisa e sistema di compensacion den Gobierno, e 25 porciento aki ta similar na un promocion di dos a tres nivel den un solo biaha. SER ta considera e pago aki desproporcional y como tal, ta kere cu Gobierno mester aplica articulo 25 di LMA cu hopi cautela y den casonan excepcional, particularmente mester den cuadro cu mester bay baha gasto di e aparato publico.

SER tambe ta conseha cu e Minister en cuestion busca e expertonan den e propio aparato publico prome cu pasa pa atrae personal di afo. Den luz di un maneho consistente, SER ta propone pa establece un maximo di personal pa Ministerio riba un ley, pa asina percura cu tur Gobierno y Minister lo mantene nan mes na e cantidad. Di e forma aki por baha e gastonan di personal na Ministerionan substancialmente.

Conclusion

SER ta convenci cu Gobierno lo reduci su gastonan substancialmente si limita su tareanan y restructura ehecucion di cierto areanan, ademas cu lo por genera mas entrada y asina baha e deficit presupuestario.

Esaki ta mas urgente cu nunca den luz di e consecuencianan financiero/economico enorme di e crisis di COVID-19, particularmente si tuma e conseho di SER na 2014 den su rapport ‘Economisacion den aparato publico.’

No mester separa e posibilidadnan pa sector priva den varios di e ahustacionnan proponi pa SER, esta cu cierto funcionnan por pasa pa companianan. Como tal SER ta urgi Gobierno pa drenta den un dialogo serio cu tur gremio, pa asina haya un bon bista cua ta e tareanan cu sector priva lo por haci.

Tambe SER ta recomenda pa hiba un dialogo specifico y structura cu sindicatonan di empleadonan publico riba e consecuencia pa e posicion huridico di e trahado na momento cu Gobierno pasa un tarea pa sector priva, of ta restructura ehecucion di algun tarea di Gobierno. Ademas, sindicatonan mester ta informa riba potencial cambio den e forma cu ta evalua compensacion di trabounan. Pa e motibo aki, SER ta urgi Gobierno pa bolbe institui e asina yama GOA, cu ta Gestructureerd Overleg Ambtenarenzaken, pa evita cu cada biaha mester negocia cu sindicatonan separa.

Finalmente, SER ta kere cu mester duna preferencia na e reformanan di belasting unda e enfasis mester ta riba simplificacion di esaki unda ta move di belasting directo pa indirecto, por ehempel door di introduccion di un asina yama ‘fuel tax.’

SER ta spera cu Gobierno duna e recomendacionnan aki e atencion necesario, pa den cuadro di e periodo financiero economico pisa, realmente tuma pasonan concreto pa di un banda, baha gasto publico y di otro banda, genera mas entrada.