Aborto ta un taboe cu poco poco ta cuminsa habri na Aruba

Vanessa Croes- Croes  ta coordinador di caminata Pro Bida Aruba cu e aña aki ta cumpli 5 aña cu e comision aki ta organisa e actividad aki pa proteccion di bida fei di momento di Concepcion.

Problematica di aborto
Encuanto e problematica di abordo riba nos isla nan no tin un cifra “oficial” considerando cu aborto ta un acto ilegal na Aruba. “Un cifra nos no tin pa motibo cu esaki na Aruba ta ilegal pues ta dificil pa ser documenta”, el a bisa.

Sinembargo analisando cifranan di afo cu nan ta haya ora cu nan ta bay atende diferente conferencia nan por mira cu mundialmente e problematica di aborto ta alarmante. Na Aruba e forma cu nan ta haci pa yuda conscientisa y preveni practica di aborto ta cu nan ta bay diferente organisacionnan y/of evenementonan pa duna informacion riba consecuencia di aborto. Nan ta participa pa ehempel den otro caminatanan cu nan mes T-shirt y tambe via nan Facebook nan ta duna conseho na esunnan cu ta puntra. 

Nan ta nota cu durante añanan cu aborto ta un “taboe” riba nos isla pasobra no ta facil pa hendenan bin puntra di e topico y tampoco nan no kier bin papia riba e situacion.  Pero nan ta ripara cu poco poco e pensamento ta cuminsa habri.

“Nos ta mira cu un di e factor grandi ta miedo. Kico hende ta bay pensa… Kico mundo ta bay bisa di bo”, segun sra. Croes-Croes.  E ta haya cu esaki ta un trabou cu e comision aki mester haci pa sigui duna e curashi pa kibra cu e taboe aki. Esey ta loke comision Caminata Pro Bida  ta haci principalmente dor di atende eventonan hubenil. Pero no solamente hubenil pasobra den adulto tambe e problematica di aborto ta sosode cu frecuencia, segun sra. Croes-Croes.

Concepcion

El a splica cu e meta tras di e actividad aki ta esun di conscientisa henter nos pueblo riba Concepcion, kiermen cu bida di ser humano ta cuminsa fei di e momento ey. “Kiermen cu e bida precioso cuanto desaroyo ta sosode fei di momento cu e ser femenino ainda no sa mes cu e ta den spera di un ser humano. Di un baby y sigur ta nos meta y ta nos mision pa asina aki protege e ser humano for di chikito, chikito”,  sra. Vanesa Croes-Croes a bisa.

Nan ta duna sosten pa medio di conseho na personanan cu ta na  spera y na e famia cu mester di sosten den esaki. Aworaki nan ta haya cu hopi famia ta tuma contacto cu nan pa facilita tur articulo di baby pa nan colecta y  entrega nan den forma di ayudo na e famia den necesidad cu tin baby, pero cu no tin e modo di cumpra e articulonan aki. Sra. Croes-Croes a bisa cu durante e ultimo añanan e tipo di colecta aki a duna hopi fruta. Nan a yuda diferente famia cu tabatin mester di material. “Nos ta contento cu tur esnan cu ta aporta. Un danki di curason!”, el a bisa. 

Comision caminata Pro Bida

El a laga sa cu e comision encarga cu e caminata aki ta haci’e cu hopi amor pa medio di “enfoca riba locual nos ta kere”.  Nan ta kere cu un di e enfoke ta esun di duna educacion riba kico ta sosode  cu pa ehempel fei di momento mes di Concepcion ya e DNA di e ser humano ta ser crea.  Tambe caracteristicanan fisico manera sexo, color di cabey, color di wowo, forma di cara y color di cuero ya ta ser determina.  Tur e caracteristicanan aki nan ta considera cu ta desaroyonan precioso di e ser humano cu hopi biaha “nos wowonan no ta mira pero cu ta papia caba di bida fei di e momento ey”, el a laga sa.

Esey –segun sra. Croes-Croes e comision aki ta haci pa un lustro caba y sigur cu hopi placer e aña aki cu nan ta celebra nan di cinco aniversario.   El a splica cu na ta un comision cu ta reuni tur luna riba un dia special. P’esey nan a convoca un conferencia di prensa dialuna 4 di april ultimo cu ta dia cu nos ta recorda e Anunciacion na Maria di e nacemento di Hesus ya cu esaki ta e inspiracion di henter nan trabou y forsa pa protege e ser humano.   

Generalmente nan ta reuni riba dia 25 di cada luna caminda nan ta haci oracion pro bida pa pidi forsa na Dios  pa proteccion di baby henter mundo, y tambe nan ta reuni pa prepara cada caminata. El a bisa cu e ayudo di tur hende e comision a yega unda e tin cu yega y pa e sigui desaroya den forma positivo pa henter nos pueblo di Aruba.