Awe den oranan di mainta, senado di Argentina a aproba un ley di oficialismo pa legalisa aborto despues di un largo debate, loke a causa un celebracion inmenso di un multitud cu tabata apoya e iniciativa.
E ley -pionero despues di Cuba y Uruguay na un region profundamente catolico como Latino America- ta busca evita e morto di muhenan cu ta realisa aborto di forma clandestino, mediante interupcion legal y gratis di embaraso te siman 14 di gestacion.
“Awe nos ta skirbi historia”, Elizabeth Victoria Gómez Alcorta, minister di cartera di Hende Muhe, Género y Diversidad a bisa.
Un multitud di muhenan y defensornan di derechonan femenino, cu tabata bisti pañanan berde, a haci un celebracion pafo di Congreso, na centro di Buenos Aires, ora e ley a wordo aproba den oranan di marduga cu 38 voto na fabor, 29 den contra y un abstencion.
E proyecto, cu a haya impulso di e presidente di centro-iskierda Alberto Fernandez, a dividi e sociedad Argentino y tambe e Congreso, na unda a ricibi e apoyo di legisladonan oficialista y opositor.
Simannan atras, e norma a wordo aproba pa Camara di Diputado aunke Iglesia Catolico local tabata opone pa esey. Te Papa Francisco -di nacionalidad Argentino- diamars ultimo a critica e iniciativa a traves di un tweet: “Tur Persona cu ta wordo descarta ta un yiu di Dios”.
E actual normativa Argentina ta permiti solamente e interupcion boluntario di embaraso ora tin un riesgo grave pa e mama of den caso di violacion, pero esun cu a haci impulso di e legalisacion di aborto ta destaca cu ni den casonan aki e muhenan -specialmente esun cu menos recurso economico- ta ricibi un atencion adecua.
E cambio di normativa a wordo rechasa varios biaha pa Congreso, aunke nunca a conta cu respaldo specifico di e partido gobernante.
Hunto cu e proyecto pa legalisa aborto, varios senador a aproba un norma paralelo pa asisti e muhenan cu lo kier continua su embaraso y ta enfrenta severo dificultadnan economico of social.
