Administracion di Trump a bisa diabierna cu e tin autoridad pa prohibi uso di TikTok pa Mericanonan, bisando den documentonan den corte cu e app di video propiedad Chines ta un riesgo pa seguridad nacional pa motibo di un relacion cu gobierno Chines.
Abogadonan di administracion di Trump a bisa den un documento diabierna cu corte na Washington DC cu gobierno Mericano mester tin permiso pa impone restriccion riba e app cu lo hacie no usabel na Merca otro luna. E restriccionnan proponi ta den linea cu autoridad di e presidente pa protege seguridad nacional Mericano y limitando e podernan aki ta bay contra ley y veredictonan den pasado, abogadonan di gobierno Mericano a bisa.
“No mester preveni e presidente di regula menasanan na seguridad nacional simplemente pasobra un adversario stranhero ta sconde su actividadnan den un compania mediatico”, abogadonan di gobierno a bisa den e documento di 46 pagina.
Un orden ehecutivo cu presidente Donald Trump a firma na augustus ta prohibi cualkier transaccion Mericano cu compania mama di TikTok, ByteDance, bisando cu e data cu TikTok ta colecta ta ‘menasa di permiti e acceso di Partido Comunista Chines na informacion personal Mericano’ y lo por permiti China track e ubicacion di empleado- y contratistanan federal. Na september, un hues federal a otorga e peticion di TikTok pa un orden hudicial preliminar contra e orden.
Un orden ehecutivo separa, emiti dia 14 di augustus, a duna orden pa ByteDance bende su operacionnan Mericano prome cu dia 12 di november, conduciendo na un acuerdo potencial cu Oracle, cual actualmente ta incierto.
TikTok ta retando e orden ehecutivo, argumentando cu Trump no a sigui e proceso debido of duna evidencia cu TikTok berdaderamente ta un menasa.
