ORANJESTAD — Despues di a cancela e caso sumario di 6 peticionario di asilo, abogado David Kock a dicidi pa warda decision oficial di gobierno pa entrega un apelacion conforme Landsverordening Administratieve Rechtspraak (LAR).

Sr. Kock a confirma na Bon Dia cu a dicidi di ‘change gears’ den su plan pa yega na demanda estado Hulandes, despues cu gobierno a dicidi di laga e grupo di peticionario liber riba meldplicht diario. Mirando cu conforme e tratado no por mantene peticionario di asilo cera wardando deportacion, e abogado a entama e caso sumario. Sinembargo, ora gobierno a laga nan liber, e necesidad di entama un caso sumario pa asina haya un contesta di hues acelera no t’ey mas. Na mes momento, lo ta un peliger pa perde e caso, ‘mirando cu nan lo declara bo no admisibel’.

Abogado: ‘No mag prohibi peticionario pa traha’
Actualmente, ora Guarda Nos Costa laga peticionario di asilo los riba meldplicht, nan ta exigi cu e peticionarionan presenta na Guarda Nos Costa cu un garante, cu meldplicht diario, ademas di prohibi nan di traha. Riba tur tres aspecto, e abogado a conta fuente Amigoe Aruba cu ‘na nos opinion [esey] no mag’.

Pendiente e decision di gobierno, sr. Kock lo bay apela e decisionnan di peticionarionan cu e ta representa lo haya, en caso cu ta un decision negativo. Esaki ta un trayectorio largo, mirando cu comision di LAR tin hopi apelacion pa trata. Si gobierno mishi cu e peticionarionan, sr. Kock a conta Bon Dia Aruba cu lo aplica e provision (voorlopige voorziening) pa asina percura pa nan libertad mientras e proceso di apelacion ta cana.

Maneho y ley mester ta conforme tratado
Durante conferencia di prensa di gobierno ayera mainta, prome minister Evelyn Wever-Croes a declara cu Aruba su maneho referente peticionario di asilo ta basa riba tratadonan internacional. Pues esunnan cu en berdad ta bin na remarca pa ayudo, lo ricibi esaki. Sinembargo, un observacion importante cu mester haci ta cu, huridicamente, si ley of regulacion local no ta conforme tratadonan internacional firma pa un gobierno, e tratadonan semper tin mas peso. Y un hues por declara cu gobierno su maneho of ley no ta conforme e tratado. Despues lo por tin exigencia pa cambia maneho of ley, pa asina refleha un tratado, den caso cu esaki no ta tumando luga.

Ademas, tratadonan internacional ta exigi cu gobiernonan mester provee pa cualkier peticionario di asilo, mescos cu den casonan unda accident ta pasa cu personanan ilegal, ta gobierno mester paga, pasobra gobierno a tolera e personanan pa t’ey den su teritorio.

Responsabilidad di Reino
Hustamente esaki abogadonan manera David Kock kier bringa, pa responsabilisa Hulanda, kende te na momentonan actual tabatin envolvimento limita riba tereno di asilo. Servicio di Inmigracion y Naturalisacion (IND) a manda asistencia tecnico pa train 10 persona, pa asina acelera e proceso largo di emiti decision riba peticionnan di asilo. Entre otro, a base di articulo 43, inciso 1 y 2 di Statuut, unda ta declara cu maske cada pais tin cu carga responsabilidad pa entre otro derecho humano y bon gobernacion, ta tarea di Reino pa garantisa e derechonan fundamental. Sr. Kock ta haya cu Hulanda mester contribui mas pa sigura derecho humano na Aruba. E idea ta pa yega na un instancia hudicial mas halto pa test si Aruba y Reino ta ehecutando e tratado.

Segun secretario di estado, Raymond Knops (di relacionnan di Reino), contestando pregunta di un parlamentario Hulandes, cualkier pais di Reino por pidi otro pais di Reino asistencia pa proteha derechonan fundamental, conforme e articulo menciona. Sinembargo, con cada pais ta implementa e siguransa di derecho, ta keda na nan individualmente. Corsou a entrega un peticion di tal indole na Hulanda, cual actualmente ta hayando forma, den januari ultimo.

Di otro banda, gobierno di Aruba hunto cu Parlamento a tende e señal di gobierno Hulandes, y en bes di pidi ayudo cerca nos partner den Reino, ta purbando haya asistencia cerca entre otro Union Europeo, pa asina por atende cu e tema di asilo.