Un experto den ley constitucional Mericano a bisa ayera cu Merca a acusa fundador di WikiLeaks, Julian Assange bao un ley di spionahe ‘extraordinariamente amplio’ cu a ser usa den pasado pa acusacionnan cu motibo politico.

Papiando durante audiencia di extradicion di Assange na London, abogado di derechonan humano Carey Shenkman a referi na e Espionage Act di mas di un siglo bieu como ‘un di e leynan mas contencioso na Merca’.

Shenkman, kende a co-skirbi un buki riba e historia di e ley, a testigua como testigo pa Assange, di 49 aña di edad, kende ta luchando contra su extradicion for di Reino Uni pa Merca.

Fiscalnan Mericano a acusa Assange di 17 cargo di spionahe y un cargo di mal uso di computer tocante e publicacion di WikiLeaks di documentonan militar Mericano secreto, un decada atras. E cargonan tin un sentencia maximo di 175 aña di prison.

Team di defensa di Assange ta argumenta cu e ta un periodista y tin derecho riba proteccion di Prome Amienda pa publica documentonan cu a leak exponiendo actonan incorecto di ehercito Mericano na Irak y Afghanistan. Su abogadonan ta bisa cu e ta enfrentando un huicio politicamente motiva cu lo horca libertad di prensa y pone periodistanan rond mundo den riesgo.

Shenkman tambe a bisa den un declaracion di testigo por escrito cu e administracion di presidente Donald Trump a ‘enhuicia revelacionnan di informacion di seguridad nacional mas agresivamente cu cualkier presidencia den historia di Merca’.

El a bisa cu tabatin ocho huicio di fuentenan di medionan di comunicacion pa Espionage Act durante e dos termino di ex-presidente Barack Obama – mas cu cualkier administracion anterior – y ocho den menos di dos aña di Trump.

Shenkman a bisa cu nunca tabatin un huicio exitoso contra un editor bao di e acto, maske tin intento, incluyendo tocante e leak di ‘Pentagon Papers’ na 1971, di documentonan tocante e guera na Vietnam. E persona cu a leak, Daniel Ellsberg, a enfrenta 12 cargo di Espionage Act y hasta 115 aña den prison, pero a descarta tur cargo na 1973 pa motibo di actuacion incorecto di gobierno contra Ellsberg.

Ellsberg, un di e whistleblowers mas famoso den memoria bibo, a sali den defensa di Assange diaranson, bisando Corte Criminal Central di London cu e y e fundador di WikiLeaks tin ‘opinion politico hopi comparabel’.

E caso, cual ta tumando luga bao restriccion di distancia social pa coronavirus, ta plaga pa fayonan tecnico mientras testigonan ta duna evidencia via video link. Shenkman a testigua cu un celular na su horea despues di problema cu audio.

Shenkman a reconoce durante un contra-interogatorio iritante di Clair Dobbin, un abogado pa gobierno Mericano, cu e tabata parti di un team cu a representa Assange varios aña atras. El a bisa cu esaki no tabata relevante na su analisis di Espionage Act, notando cu e tempo ey e tabata un abogado hopi junior.

“Den e cadena alimenticio di abogado, ami tabata plankton”, el a bisa.

Gobierno Mericano ta bisa cu WikiLeaks ta pone bida di informantenan Mericano den zonanan di conflicto y otronan den riesgo door di publica documentonan secreto.

Testigo di defensa, John Sloboda, co-fundador di e organisacion Iraq Body Count, a bisa cu WikiLeaks tabata cuidadoso pa sigura cu ta elimina nombernan prome cu publicacion. E tabata den desacuerdo cu un sugerencia di abogado acusador cu Assange tabatin un ‘actitud cavalier’ pa redaccion.

Sloboda, kende tabata involucra den publicacion di documentonan di guera di Irak na 2010, a bisa cu nan ‘a wordo redacta di mas pa precaucion’. El a bisa cu su grupo a desaroya software pa yuda agilisa e proceso door di elimina tur palabra cu no tabata den un diccionario di Ingles, maske el a reconoce cu no ta perfecto.

Assange, kende ta mara den batayanan legal pa un decada, ta den un prison Britanico desde cu a sak’e di su refugio den embahada Ecuatoriano na London na april 2019.

E audiencia di extradicion na corte criminal Old Bailey na London ta programa pa dura te comienso di october.