Abogado ta bati alarma pa condicion deplorabel na prizon Pointe Blanche

Abogado Sjamira Roseburg a bati alarma tocante e situacion inhumano den prizon Pointe Blanche. A pesar di un veredicto di Corte Europeo di Derechonan Humano, e derechonan di presonan ainda ta ser viola, el a bisa. “E situacion ainda ta degradante.”

Tres preso ta comparti un cel di 12m² cu awa ta lek. E prizon ta infesta cu cacalaca, y staf tin problema pa maneha calamidad, y esaki ta apenas algun di e problemanan cu e presonan y nan abogado ta confronta durante nan detencion.

A pesar di e hecho cu St. Maarten actualmente ta goberna pa un gobierno encarga, e momento pa actua ta awo, segun Roseburg. “No compronde mi malo, si bo comete un ofensa criminal mester sirbi bo tempo, pero bo ta keda un ser humano y ainda nos ta parti di Reino Hulandes.”

Segun e abogado, ta e regla na luga di excepcion cu detenidonan ta ser teni den warda di polis pa mas di e termino maximo di 10 dia. Esaki pasobra e prizon actualmente tin un capacidad maximo di 70 persona, despues di un politica estableci pa fiscal despues di horcan Irma na 2017. Desde cu el a check ultimo biaha dia 20 di october, sikiera 76 detenido actualmente ta cera den e prizon y cinco den warda di polis. E cinco persona aki mester ta cera den Pointe Blanche.

Roseburg ta resalta cu si un persona no ser transferi na e prizon den 10 dia, mester libera e detenido inmediatamente. Si e prizon ta yen of no, no tin consecuencia. “Esaki ta regla legal cu mester cumpli.” El a declara cu no ta conoci cu ki basa ta selecta detenidonan pa libera trempan mientras otronan no.

Na october 2018, Corte Europeo di Derechonan Humano a condena e condicion inhumano den cual e hefe di casino naci na Italia, Francesco Corallo, a ser teni den Warda di Polis na Philipsburg. Sinembargo, autoridad hudicial na St. Maarten no ta tene nan mes na e reglanan, segun Roseburg. “Si bo no por ofrece condicionnan decente pa detencion, bo no mester sigui cu aresto y detencion.”

Comite Europeo pa Prevencion di Tortura y Trato of Castigo Denigrante of Inhumano, CTP, a conclui den su reporte cu un detenido no mester keda mas di tres y nunca mas di 10 dia den cel di Warda di Polis na Philipsburg.

Ademas, no tin aire fresco ni recreacion. Sistema di siguridad no ta traha optimalmente, y peticion pa bishita un dokter of hospital no ta ser acepta.

Roseburg tin su preocupacion tocante ki tempo e plan a largo plaso pa un prizon nobo lo cuminsa a corto plaso. “Si algo simpel como instala un mashin di laba y seca paña ta dura asina largo, despues di entrega un demanda tocante esaki na 2017, mi no tin speransa.”