Ayera e portal di noticia local, Noticia Cla, a publica informacion cu abogado Anthony Ruiz y e compania Arulex a entrega un keho penal contra e portal di noticia 24ora, y e periodistanan Patrick Paskel y Nelson “Speed” Andrade, na Ministerio Publico.
Segun e publicacion ta indica, e keho entrega pa e abogado ta pa difamacion, calumnia y instiga odio. Esaki basa, segun Ruiz, cu periodistanan menciona a haci declaracionnan infunda cu por tin consecuencia grave.
E portal ta splica cu e declaracionnan aki tin di haci cu e relacion cu e compania Arulex tin cu e proyecto di e hotel Secrets na Seroe Colorado, specialmente cu e compania no a respeta un sentencia di hues den cual a indica cu mester a para e trabao di construccion di e hotel, pendiente clarificacion riba e permiso di construccion pa haci e trabao.
Segun Noticia Cla ta indica, den e declaracion, Ruiz y Arulex ta splica cu e compania ta fungi como trust service provider. “Pa por duna tur servicio relaciona cu esaki, Arulex a ricibi un vergunning di Centrale Bank van Aruba, y ta bao di supervision continuo di Centrale Bank van Aruba” e declaracion ta sigui bisa.
“Arulex ta mantene su mes dentro di e margen di ley y den cuadro di esaki, ta respeta sentencia di huez. Como director, Arulex no ta dicidi pa ningun compania, sin consulta prome cu su cliente como cu tin regla cu ta aplica entre e trust service provider y e cliente y Arulex ta tene su mes na esaki”.
Den e publicacion, e portal di noticia a ricibi reaccion di parti di e periodistanan en cuestion. “Anthony Ruiz ta un abogado haragan, golos y yoron”, e periodistanan a indica. “No ta prome biaha e ta bay. Nos a haci nos trabao di señala cu bo no por ta abogado di un proyecto hotelero, bo mes ta director tambe y di otro banda bo ta huisadvocaat (of consehero) di e mesun minister cu ta otorga tereno of permiso di construccion. Esey ta haci bo haragan golos. Y ora gara bo den e conflicto di interes, e ora kier bay recherche pa entrega keho…cu ta haci bo yoron tambe!” e dos periodista a finalisa.
