Abogadonan, Polis y politiconan a reacciona cu shock y horor di e asesinato sin precedente di un top abogado penal, cu a ser mata pa tironan na Amsterdam diaranson durante oranan di mainta.
Derk Wiersum tabata defende e testigo principal den un investigacion importante di Gangland y tin sugerencianan cu esaki por tin conexion cu e caso.
E Agencia Nacional di Terorismo NCTV a ser recluta pa yuda cu e investigacion. Wiersum tabata representa Nabil B, un testigo principal den e caso contra e hefe di e Gangland Ridouan Taghi. Ta ser bisa cu Taghi ta tras di un serie di asesinato na Ytrecht y Amsterdam den e guera di droga di ‘mocro mafia’. Aña pasa Nabil B su ruman a ser asesina, den kico nan ta pensa cu tabata un advertencia pa Nabil pa asina e no testigua of un caso di identificacion ekiboca. E asesinato a tuma luga alrededor di 7 y mey di mainta.
Bisiñanan a bisa cu nan a scucha varios tiro y e tiradonan tin e edad di 16 pa 20 aña bisti na preto y a bandona e sitio na pia. Segun e testigonan, Wiersun tabata cu su casa ora el a ser asesina. Wiersun tabata socio di un buffet di abogado importante na Amsterdam y tabata enfoca riba casonan relaciona cu crimen organisa.
Previamente el a adverti cu Ministerio Publico no ta haciendo suficiente pa proteha e testigo principal. Tambe e tabata un Hues part-time. Simpatisantenan a laga flor na porta di e buffet di abogado na unda e tabata traha.
Prome Minister Mark Rutte y Minister di Asuntonan Legal Sander Dekker a bisa cu nan ta extremadamente conmociona pa e asesinato y e Alcalde di Amsterdam Femke Halsema, a yama un reunion di emergencia cu Hefenan di Polis y funcionarionan di Ministerio di Husticia. “E caso aki tin maximo prioridad”, e Alcalde a bisa.
E detayenan ainda ta incompleto, pa motibo nos mester tin cuido pa saca conclusionnan, pero ta sorprendente cu cosnan asina por sosode den nos democracia. Nos ta desea su famia y coleganan hopi forsa den e momento dificil aki”, e Colegio di Abogadonan Hulandes a bisa den un comunicado. E Hefe di Polis Nacional Erik Ankerboom a describi e asesinato como uno brutal. “E asesinato brutal aki yega un limite nobo”, el a a bisa. “Awo e personanan cu ta haciendo nan trabou no ta parce di ta safe”.
