Patrick van der Biezen, kende actualmente ta fungi como abogado, lo bira fiscal di Ministerio Publico.
Parce cu den pasado, Patrick van der Biezen a wordo acerca, pero e no tabata cla pa e reto y awor si e ta cla. PG y miembronan di Ministerio Publico a mira cu e tabata un candidato potencial pa ta un fiscal na Ministerio Publico. El a wordo conseha pa solicita na momento cu tabata tin vacatura pa un Fiscal. Tabata tin diferente otro candidato mas cu a solicita.
Despues di a haci tur e proceso cu esaki ta trece cune, e escogencia a cay riba Patrick van der Biezen. Despues di pasa tur proceso cu falta ainda, Patrick van der Biezen ta cla pa acepta e reto como un fiscal Arubiano.
Patrick ta sali for di un cas cu hopi bon educacion. Su tata ta Leo van der Biezen, un inspector di polis cu tin como 35 aña den Cuerpo Policial, y casa cu Mayra. Semper nan a traha duro pa guia y educa nan yiunan. Den e caso aki, Ministerio Publico a mira e talento den Patrick van der Biezen pa bira un fiscal. Algun aña atras, Patrick a caba Erasmus universiteit, un di esunnan cu mas renombre mundialmente.
Despues el a bini Aruba y cu brasa habri Chris Lejuez a tum’e pa traha cune na su bufete. Despues e tabata tin un careda exitoso como abogado, ganando casi tur caso cu el a defende.
Pabien na Patrick y henter su famia cu e escogencia aki cu ta importante. Nos yiunan di tera mester asumi puestonan asina importante pa nos pais. Nan sa kico ta e cultura di nos isla y e doornan di nos pueblo. Esey ta diferente cu e fiscalnan Hulandes, cu hopi biaha ta bin cu mentalidad di Hulanda, cu ta full diferente cu esun di Aruba. Pueblo mester ta contento ora nos mesun hobennan prepara asumi funcionnan asina importante.
