Recientemente, conocido abogado Lincoln Gomez a publica riba su rednan social un analisis enfoca riba e prestacion di Aruba Fair Trade Authority na 2024. Akibao un traduccion di su articulo.

Aruba Fair Trade Authority, AFTA, a completa tres cuarta parti di su operacion, pero su efectividad y prioridadnan ta merece scrutinio. Mi a skirbi tocante AFTA anteriormente, incluyendo un analisis detaya di e ley nobo anti-competencia di Aruba y e intervencion di cierto practica di (cierto) realtor na Aruba. E pregunta awo ta, AFTA a cumpli cu su mandato?

Real Estate: Victoria Chikito, Pregunta Grandi

Un di e logronan principal di AFTA te awo ta den real estate. Asociacion di Aruban Realtors a haya su mes forsa pa stop cierto practica cu por viola leynan di competencia. Sinembargo, esaki principalmente ta afecta un grupo chikito: broker y e porcentahe chikito di e poblacion cu por afford pa cumpra propiedad of esnan cumprando un di dos cas.

Pa mayoria di Arubiano, e accion aki no ta parce di duna ningun beneficio tangible.

E pregunta mas amplio ta keda: Pakico AFTA ta enfoca riba real estate mientras sectornan mas grandi lo por beneficia di mas atencion? Real estate ta representa un parti chikito di e realidad financiero di e poblacion, mientras hopi empresa propiedad di of controla pa gobierno ta afecta tur hende.

E aparente falta di accion di AFTA ta genera preocupacion

Na mei, Comerciantenan Uni Aruba (CUA) a expresa preocupacion tocante SETAR, e proveedor di telecomunicacion propiedad estatal, acusando e di practicanan monopolistico y haciendo un yamado pa AFTA investiga. Respuesta di AFTA tabata inmediato – a emiti un comunicado di prensa primintiendo pa reuni cu SETAR. Sinembargo, cuatro luna despues, no a duna ningun follow-up, update of resultado. SETAR a continua operando sin ningun cambio visible na su dominio di mercado.

Den su comunicado di prensa original AFTA a enfatisa e necesidad pa ta cauteloso pa motibo di su recursonan y capacidad limita. AFTA tambe a declara cu e “Mededingingsverordening”, esta e ley anticompetencia, ta nobo y su enfoke inmediato ta pa educa negoshi a traves di asociacionnan. Pero e cautela y duda aki lo por ta puntando riba un problema mas profundo?

Esaki ta genera pregunta tocante prehuicio (bias): AFTA no ta dispuesto pa reta empresanan propiedad di gobierno manera SETAR? A pesar di su declaracionnan di independencia, liderazgo di AFTA tin lasonan cercano cu Minister di Asunto Economico, kende ta supervisa SETAR. Si forsa cumplimento di e ley di competencia riba un empresa estatal dominante por beneficia e isla, pakico AFTA no ta actua mas decisivamente? Specialmente mirando cu companianan di telecomunicacion propiedad di estado globalmente a haya nan mes forsa pa adapta na nan posicionnan di comportamento pa motibo di nan posicionnan dominante.

Cuido di salud: otro area di preocupacion

Otro sector cu ta afecta tur Arubiano ta cuido di salud, pero toch AFTA a mustra duda similar pa atend’e. Mientras cu e sistema di cuido di salud ta plega cu preocupacion tocante tendencianan monopolistico y competencia inhusto, e intervencion di AFTA ta minimo. Tempo lo bisa si nan ta bay tuma accion significante, pero nan cautela ta preocupante.

Si AFTA continua duda den sectornan cu tin impacto riba e poblacion mas amplio, e ta den riesgo di bira un cuerpo cu ta trata solamente asuntonan niche mientras ta evadi areanan unda competencia ta crucial pa bienestar di tur hende.

AFTA ta presenta su mes como un organisacion chikito cu recursonan limita, y su retonan ta bay mas leu cu djis limitacionnan presupuestario.

Cantidad di personal tambe ta un problema grandi. E profesional cu mas experiencia den nan team a retira, y e personal legal cu ta keda – mientras cu tin diploma di ley – ta carece di experiencia significante den sector priva. E ausencia aki di un track record proba den un ambiente competitivo cu hopi den riesgo ta preocupante, ya cu experticio asina ta crucial pa efectivamente forsa cumplimento di leynan di competencia.

Manera mi a mira den gobierno, graduadonan di ley sin experiencia den sector priva hopi biaha no ta hala atencion di companianan buscando talento legal top. E gap aki den experiencia dentro di AFTA ta genera duda severo tocante nan capacidad pa handle investigacionnan mas substancial, particularmente esnan involucrando entidadnan grandi controla pa gobierno.

Si e mensahe di AFTA pa publico ta cu ainda nan ta siñando e manera pa motibo di nan retonan di personal, ta facil pa mira pakico nan accionnan por cay bao di expectativanan. Cu experticio y experiencia limita, ta dificil pa nan atende casonan mas compleho cu por beneficia e comunidad mas amplio.

Estudio di Prijs di AFTA: Impreciso

Anteriormente e luna aki, AFTA a publica e resultado di un estudio riba prijs di cuminda, comparando Aruba cu Hulanda, Corsou y Merca. E hallazgonan tabata predecible: cuminda ta mas caro na Aruba. AFTA a gasta tempo y recurso pa bisa loke nos tabata sa caba. A pesar di esaki hasta e rapport ta mustra algun inconsistencia. Algun retailer a destaca cu e rapport no ta tene cuenta cu cierto prijs di producto cu ta mas o menos similar compara cu Merca y Hulanda y algun articulo, manera keshi Hulandes, cu ta mas barata akinan cu den exterior.

AFTA a atribui e prijsnan halto na factornan manera dependencia riba importacion, costo di transporte y competencia limita den e cadena di logistica. Acuerdonan exclusivo di distribucion entre importadornan y mayoristanan tambe a keda resalta como potencial drivernan di prijs.

Mientras cu algun di e conclusionnan di AFTA ta factualmente of en gran parti corecto, e lenguahe di e rapport tabata impreciso. Na lugar di ofrece solucionnan cla, e estudio tabata yen di “talbes” y “posiblemente”. Por ehemplo, AFTA a reconoce e existencia di importacion paralel – productonan no regula drentando mercado – pero a faya di menciona e riesgo na salubridad publico presenta pa condicionnan di shippinng sin monitoreo pa productonan di cuminda. Importacion paralel tambe ta preveni mayoristanan di por controla of manipula prijs.

Ademas, e estudio a duna gobierno un “free pass” door di bagatelisa e impacto di impuesto di importacion y douane waarde, significantemente inflando prijs di cuminda. Door di enfoca riba practicanan di sector priva mientras a ignora e rol di politicanan di gobierno, AFTA un biaha mas a genera preocupacion tocante su prehuicio pa protege interesnan di gobierno.

Conclusion: Prioridadnan di AFTA ta parce robes

Mientras cu e limitacion di recurso di AFTA ta un preocupacion legitimo, esaki no mester sirbi como excuus pa inaccion, particularmente den sectornan cu ta afecta henter poblacion. E reluctancia di e autoridad pa atende problemanan significante involucrando empresanan propiedad di gobierno, combina cu su rapportnan impreciso, falta di accion tangible y enfoke riba esfuersonan di PR, ta sugeri cu e prioridadnan di AFTA por ta robes.

Si AFTA tin meta pa fomenta competencia husto na Aruba, mester bay mas leu cu victorianan chikito den mercadonan niche y tuma casonan mas significante y cu mayor impacto, cu ta afecta tur hende. Si no haci esaki ta den riesgo di disminui confiansa publico, lagando AFTA como un organisacion sin djente mas preocupa cu con cos ta mustra en bes di resultadonan.

Mi ta sostene AFTA y su mision, pero esaki no ta preveni mi di ta critico y informa boso – e comunidad. Bishita www.lincolngomez.com pa mas.