Despues cu prome minister Evelyn Wever-Croes a entrega retiro di Gabinete Wever-Croes II preparacionnan a cuminsa pa eleccion cu lo tuma luga dia 6 di december proximo y campañanan politico a cuminsa casi inmdediatamente. Un aspecto cu ta importante pero cu no tin hopi enfoke riba dje ta ley di financiamento di campaña. Abogado Lincoln D. Gomez recientemente a skirbi un articulo den cual e ta elabora riba e leynan cu ta goberna partidonan politico y financiamento di campaña.

Abogado Gomez ta splica e Landsverordening politieke partijen ta pone e leynan aki den detaye y amiendanan recien a introduci regulacionnan estricto riba financiamento di campaña y aunke no tabatin mucho “fanfaria” na momento cu cambionan a ser realisa, el a specifica cu e regulacionnan ta cla.

El a sigui splica cu un partido politico ta ser defini como un grupo legalmente registra na Aruba cu ta contribui na pensamento politico, compromiso di ciudadano y e seleccion di candidatonan pa eleccion. Solamente partidonan registra por participa den eleccion y segun informacion tin un total di 23 partido politico actualmente registra na Censo.

Conseho Electoral ta funciona independientemente di gobierno y ta supervisa eleccion y registracion di partidonan politico. E ta fungi como e organo principal di eleccion pa eleccionnan parlamentario, garantisando cu tur cos ta cana segun ley.

Tocante e proceso pa partidonan politico inscribi na e Conseho Electoral, Gomez ta indica cu e partidonan politico mester inscribi pa medio di un acta notarial di asociacion. E acta aki ta delinea e nomber, meta-, y obligacionnan di e partido. Sin inscripcion apropia, partidonan no por participa den e proceso electoral.

Bayendo den direccion di e aspecto financiero, pa loke ta e administracion financiero, Gomez ta splica cu partido politico ta obliga pa mantene un administracion financiero transparente y confiabel, cu un sistema di facturacion consecutivo pa cada contribucion financiero. El a sigui splica cu un comision publico ta supervisa e finanzas di e partido- y candidatonan, sigurando cu nan ta mantene registronan exacto di contribucion-, activo-, debe- y otro entradanan. E documentonan financiero aki mester ser warda pa por lo menos dies aña, y mester entrega un relato financiero anual pa revision.

Pa loke ta donacionnan politico, abogado Gomez ta remarca cu donacionnan politico ta ser regula estrictamente pa ley pa garantisa husticia y transparencia. Un donacion ta ser considera como cualkier placa of mercancia duna na un partido politico of candidato sin ricibi algo di balor igual a cambio. Esaki ta inclui contribucionnan directo y tambe esnan cu ta ser canalisa pa medio di organisacionnan asocia, manera fundacionnan di recaudacion di fondo mara na politiconan.

El a splica cu e ley ta limita cuanto un individuo, negoshi of organisacion por duna como un donacion politico. E restriccionnan aki ta pa preveni cualkier un donante di tin un influencia grandi riba e proceso politico. Tur donacion mester ta transparente, sin espacio pa anonimidad. Donantenan mester ta identifica bon cla y si un donacion surpasa e limite legal, e mester ser debolbi of transferi na e tesoro di estado si esey no ta posibel.

Gomez ta enfatisa cu e cuadro huridico aki ta na su luga pa garantisa cu tur contribucion financiero na partidonan politico y candidatonan ta legitimo y someti na control publico.

Un comision publico special ta encarga cu e vigilancia di e cumplimento cu e reglanan financiero aki. E comision tin e poder pa inspecciona e registronan financiero di e partido- i candidatonan y pa impone boetnan pa violacionnan. E supervision aki ta yuda garantisa cu e leynan di financiamento di campaña ta ser sigui manera debe ser.

Gomez ta resalta un punto clave cu hopi biaha ta ser pasa por halto ta cu donacionnan di entidadnan stranhero of personanan sin residencia legal na Aruba pa por lo menos cinco aña ta estrictamente prohibi. Ta prohibi tambe pa companianan di afo haci contribucionnan politico, garantisando cu e proceso electoral ta keda liber di interferencia di afo.

Tocante con e ley ta defini donacionnan, abogado Gomez ta splica cu e ley ta tuma un bista amplio di kico ta constitui un “donacion.” E no ta inclui solamente placa, bienes y servicionan suministra na un partido of candidato tambe ta ser considera como donacion si nan tin balor. Hasta si un servicio ta ser ofreci na un descuento, e diferencia entre e prijs normal y loke a ser paga ta ser trata manera un donacion.

Ademas, el a agrega, cualkier donacion haci na un persona of organisacion cu e intencion di beneficia un partido of candidato politico ta ser considera como un donacion na e partido of candidato ey. E disposicion aki ta sigura cu tur forma di sosten financiero ta someti na e mesun control y restriccionnan legal, preveniendo cualkier buraco.

Gomez ta sigui splica cu un di e provisionnan clave di e ley ta e prohibicion contra donacionnan politico di entidadnan den cual gobierno tin interes. Partidonan politico y candidatonan ta explicitamente prohibi di acepta donacionnan di: companianan caminda gobierno tin accion; filialnan di e tipo di companianan ey; y institucionnan cu ta ricibi subsidio di gobierno.

Esaki ta nifica cu companianan manera Refineria di Aruba (RdA NV), WEB, ELMAR, SETAR, SERLIMAR, APFA y otro institucion- of fundacionnan publico similar ta legalmente prohibi di contribui na campañanan politico. E entidadnan aki ta ser financia cu placa publico y nan recursonan no mester ser usa pa influencia e paisahe politico.

Gomez ta remarca cu e regulacion aki ta vital pa mantene un proceso politico husto y transparente, liber di conflictonan di interes cu por surgi si entidadnan vincula na e Estado duna sosten financiero na partidonan politico. E ta recorda esnan den posicionnan di liderazgo dentro di e organisacionnan aki pa actua dentro di e limitenan di ley.

E ta resalta cu segun cu temporada di eleccion ta acercando, ta importante pa tur actor y candidato politico compronde y respeta e fronteranan legal aki completamente. Cumplimento di e reglanan aki ta garantisa cu e sistema democratico ta keda transparente y liber di influencia di entidadnan mara na fondonan publico.

Pa loke ta trata e cumplimento pa partidonan politico y candidatonan, abogado Gomez ta indica cu mantencion di cumplimento cu e leynan di financiamento di campaña no ta opcional y ta un rekisito legal.

E ta splica cu primeramente un partido mester ta inscribi oficialmente na e Conseho Electoral prome cu e por participa den na eleccion. Esaki ta formalisa e status di e partido y ta somet’e na tur e reglanan stipula den e Landsverordening politieke partijen.

Unabes registra, partidonan politico mester mantene nan aadministracion financiero cla y transparente. Tur contribucion mester ta registra corectamente, esaki ta inclui donacionnan directo, otro entrada y cualkier debe. Contabilidad exacto ta crucial pasobra e ta duna un bista confiabel di e salud financiero di e partido y si no mantene esaki por conduci na castigo.

Por ultimo, Gomez ta enfatisa cu e transparencia financiero no ta caba riba dia di eleccion. Partidonan politico y candidatonan mester entrega un relato financiero anual cu ta detaya nan actividadnan financiero di e aña anterior. Esaki ta garantisa supervision y responsabilidad continuo hopi mas leu cu e temporada electoral.