Diahuebs ultimo, abogado Lincoln D. Gomez a post riba su blog un articulo analisando e decision recien di gobierno di Aruba pa aumenta salario minimo pa 2025, como tambe un propuesta pa introduci regulacion mas estricto pa orario di trabao, loke ta representa un cambio significante den politica laboral di Aruba.

Segun Gomez, mientras cu ta presenta e medidanan aki como inicitivanan pro-trahador, e momento den cual nan ta yega y e potencial consecuencianan cu ta trece cune ta genera preocupacion serio.

“Manera mi a resalta den mi columna na december 2023, aumento consecutivo di salario na 2023 y 2024 ya a pone presion inmenso riba negoshi,” Gomez a skirbi. “Awo, e cambionan proponi na orario di trabao pa motibo di un salario minimo fiho pa ora na lugar di pa luna ta carga riesgo di empeora e retonan aki, menasando cu daña e trahadornan cu e politicanan aki ta bisa di kier protege. E propuesta aki ta bay backfire riba empleadonan.”

Asina mes, Gomez ta enfatisa cu loke ta mas preocupante ta momento den cual e propuesta ta yega – menos di dos siman prome cu eleccion. “Pasa e ley aki awo tin riesgo di carga e administracion nobo cu politicanan cu e no a diseña y nan conesecuencianan a largo plaso” el a skirbi. “Hasta si e administracion actual lo bolbe, nan no lo logra manage esaki. Decisionnan di e magnitud aki ta rekeri consideracion cuidadoso, no oportunismo politico.”

Gomez ta destaca e contexto den cual e propuesta aki ta yega, cual ta continua un tendencia di aumento consistente di costo di labor. Asina, ta nota cu na 2023 a aumenta salario minimo cu 4.3 porciento, alcansando Afl. 1893.41 pa luna. Despues, na 2024 un aumento adicional di 4.9 porciento ta aumenta salario minimo na Afl. 1986.20 pa luna cuminsando dia 1 di januari. Y e propuesta pa 2025, si e ley pasa, un aumento similar lo por pusha salario minimo riba Afl. 2085 pa luna otro aña.

Gomez ta destaca cu e aumentonan sucesivo aki tin efecto mas leu cu djis salario base. “E limite di pago di overtime, calcula como 2.5 biaha e salario minimo, a aumenta na Afl. 4,965.50 na 2024, y lo surpasa Afl. 5,200 na 2025,” e ta indica. “Pa industrianan manera turismo, retail y hospitality – ya caba luchando cu gastonan operacional halto – e escalacion aki ta haci labor cada bes menos pagable. Nos negoshinan chikito y mediano (SME) no por afford e aumento aki den overtime, y esaki ta e peliger grandi den pasa e ley aki.”

Ademas, Gomez ta menciona e cambio riba orario di trabao, cu tin restriccion nobo. Segun Gomez, introduccion di limitenan mas estricto riba orario di trabao ta hacie mas compleho pa negoshinan, y mientras e medida tin como meta pa reforsa proteccion di trahador, nan implicacion practico ta preocupante.

Entre otro, e ta destaca cu e regulacion proponi ta pone limite mas estricto riba e oranan maximo pa siman y overtime cu un trahador por traha. “Pa sectornan cu ta depende riba flexibilidad, manera turismo y cuido di salud, e restriccionnan aki ta bay reduci nan habilidad pa exigi fluctuacion, specialmente durante periodonan peak. Nos comunidad comercial tabata pidiendo pa flexibilidad, no mas rigides!”

Tambe e propuesta ta nifica cu dunadonan di trabao lo por tin mester di contrata personal adicional pa por cumpli cu oranan reduci pa cada trahado. “Sinembargo, den un mercado laboral preta y no flexible, esaki hopi biaha no ta realistico. E ta bay aumenta costo pa dunado di trabao sea den mas pago di overtime of den contrata mas personal.”

Igualmente, ta preocupa cu e medida nobo lo resulta den perdida di entrada pa e trahadornan mes. “Empleadonan cu ta depende riba overtime pa reforsa nan entrada lo por reduci nan ora bao di e restriccionnan nobo. Na lugar di protege trahadornan, e propuesta aki ta den riesgo di empeora nan situacion financiero. Tin biaha, ‘more is less!’”

Finalmente, Gomez ta enfatisa cu, acopla cu aumento di salario minimo y limitenan mas halto pa overtime, e limite riba ora aki ta bay aumenta gasto di payroll significantemente, pushando hopi negoshi den instabilidad financiero. Esaki riba e inflacion cu e negoshinan ya ta enfrentando.

Pakico pasa e ley awo ta problematico?

Manera menciona ariba, e momento den cual ta purbando di pasa e ley ta loke Gomez ta haya mas preocupante, particularmente mirando cu ta hopi cerca di eleccion.

“Cambionan mayor den politica, manera esaki, no mester pasa pura apenas algun dia prome cu un eleccion. Decisionnan asina ta exigi transparencia, debate, consideracion cuidadoso y un plan bon balansa – no djis lansa un triki electoral – idealmente door di un gobierno cu un mandato fresco di votadornan pa proximo 4 aña.

Gomez tambe ta preocupa cu si pasa e ley aki, e lo mara man di e siguiente administracion, cu lo mester bay deal cu su consecuencianan economico. “E potencial pa perdida di trabao, ceramento di negoshi y presion inflacionario ta bay hacie mas dificil pa cualkier gobierno nobo busca solucionnan alternativo of enfoca riba esfuersonan di recupreacion,” e ta nota. “Esaki ta bin hunto cu e administracion cu Comerciantenan Uni Aruba a expresa tocante e 2% adicional cu Asociacion di Bankero Arubiano ta bay cobra – un movida cu ta genera duda riba comercio husto di nos ‘banksters.’”

Sinembargo, Gomez ta enfatisa cu tur e potencial consecuencia negativo ainda por ser evita. “Freeze e propuesta awo lo permiti e siguiente administracion evalua si cambionan asina ta necesario,” el a skirbi. “Si nan ta, mester implementa nan como parti di un strategia mas amplio cu ta considera interes di trahado, dunado di trabao, y economia.

Pa tur e motibonan aki, Gomez ta haciendo un yamado pa freeze e propuesta, argumentando cu maneho di e cambionan aki ta un reto compleho, y cu pasa e ley aki como un medida riba su mes ta iresponsable. “E falta e pakete comprensivo di instrumento necesario pa atende su efectonan,” el a skirbi. “Si e ley aki ta hustifica mes – un asunto cu ta keda altamente debatible – mester ta implementa banda di un alivio di impuesto, incentivo comercial y salvaguardianan pa mitiga su impacto.”

Segun Gomez, e problema no ta e aumento di salario minimo riba su mes, sino su efecto cumulativo. “Aumento di e limite di pago di overtime, combina cu limitenan mas estricto riba ora di trabao, ta bay crea desaster pa negoshi y afecta e trahadornan. Empleadonan ta bay baha ora, limita cantidad di empleado, of cera den su totalidad, lagando trahadornan cu tiki oportunidad y aumento di costo di bida.”

E problema, Gomez ta enfatisa, ta cu “e ley aki ta fracasa den balansa bon intencion cu realidadnan economico. E no ta un solucion sostenible – e ta oportunismo politico pretendiendo di ta politica.” E ta insisti cu mester freeze e propuesta aki y bay den dialogo cu stakeholdernan prome cu sigui bay dilanti. “Aruba merece politica mas sabi, no decisionnan imprudente.”

Pa conclui, Gomez ta bisa cu awo ta momento pa precaucion, no pa pura. “E cambionan proponi na oranan di trabao y e aumentonan sucesivo di salario ta representa un cambio economico significante cu implicacionnan cu alcance amplio. Mientras e intencion di gobierno pa mehora proteccion pa trahadornan ta cla, su ehecucion tin riesgo di desestabilisa economia y afecta e hendenan cu ta busca pa yuda.”

Ademas, “pasa e ley aki apenas algun dia prome cu un eleccion ta un eror. E ta carga un administracion nobo cu consecuencianan evitable, ta interumpi operacion comercial y ta reduci oportunidad pa trabao.”

Segun Gomez ta sugeri, un miho maneho ta rekeri pa freeze e propuesta, evalua su efectonan a largo plaso, y sigura cu cualkier cambio den futuro ta parti di un strategia balansa y sostenible.

Por lesa mas riba website di Gomez:  www.lincolngomez.com.