Manera ta conoci Bon Dia Aruba a bin ta publica varios articulo, basa riba reaccion di experto abogado Lincoln D. Gomez, tocante e topico di introduccion di un sistema di cobransa di parti di Camara di Comercio Aruba pa por tin acceso na e registro comercial online.

Ayera abogado Gomez a publica otro articulo den cual el a sigui elabora ariba e topico aki. Manera ta conoci Camara di Comercio a reacciona riba e publicacion di Bon Dia Aruba y abogado Gomez durante un conferencia di prensa dia 21 di juni. Gomez, ken a reacciona riba e comunicado di prensa di e institucion, ta indica cu esaki tabata un intento pa hustifica nan accion y un comentario vago cu nan a busca conseho legal for di un “firma cu hopi abogado” y cu e Camara nunca a desvia di e ley.

El a destaca cu e accionnan y e manera di cobra of aumenta e tarifanan ta haci cu e ta pensa si e Camara ta confundi den su rol como un cuerpo publico y ta actua awor como un corporacion cu meta di ganashi. “Ta e nacemento di e Camara di Comercio, Inc.? E Camara di Comercio N.V.? E Camara di Comercio V.B.A.? “Nos ta aki pa traha placa riba lomba di negoshinan Arubano?” Ta esaki e lema nobo?” el a cuestiona.

Abogado Gomez ta indica cu minuutnan prome cu Camara di Comercio a cuminsa su rueda di prensa el a haci un publicacion den cual el a describi dos scenario. Den scenario 1, e Camara lo tuma un posicion mas halto, lo refleha y busca conseho legal y conseho for di e lista largo di ex miembronan di directiva. Despues e Camara lo a reconsidera y tuma responsabilidad di a ignora e eror desafortuna y sin intencion aki, y lo compromete nan mes pa tuma pasonan pa coregi e situacion. Locual e abogado a resalta lo ta un excelente prome paso pa restaura confiansa den e institucion publico.

Den scenario 2, el a indica, e Camara lo a reforsa su posicion eroneo y splica cu e meta ta hustifica e medio. Lamentablemente, e Camara a scoge scenario 2, por lo menos pa awor. El a señala cu eventualmente e Camara lo tin cu bolbe na escenario 1.

E motibo, el a splica, ta cu e Camara no por wak e pueblo Arubano y e miembronan di e Camara den nan wowo y bisa cu nunca nan a desvia di e ley, ta prueba cu nan tin fout, y ta pretende cu tur cos ta bon.

Abogado Gomez a sigui splica cu el a basa su posicion riba e ley di Registro di Comercio y e Decreto di Registro di Comercio. Basa riba e leynan aki,el a bisa cu e accionnan di e Camara ta ilegal. E Camara ta usa un subseccion di e Ley di e Camara di Comercio pa bisa, cu nan “nunca a desvia di e ley.”

“Of mi argumento ta fout of e di e Camara ta. Mi argumento ta prevalece y mi no ta insigur di esaki. Naturalmente, mi por ripiti esaki cincuenta biaha, y e no ta nifica necesariamente cu e Camara mester ta di acuerdo cu mi, pero talbes nan por ta di acuerdo cu otro cu tin hopi mas autoridad cu mi. Esaki ta trece e pregunta: unda nos por haya semehante autoridad cu ta asina respeta?” el a cuestiona.

Gomez a trece dilanti cu na Boneiro e ley di e Camara di Comercio di Boneiro y e ley di Registro di Comercio a origina for di mesun ley prome di 1 di januari 1986 y tabata aplica pa Hulanda Antiano. Dia 1 di januari, e ley di e Camara di Comercio di Aruba y e leynan di Registro di Comercio a drenta na vigor como un “copy paste” di Hulanda Antiano. Segun esaki, e leynan aki tin e mesun origen, obhetivonan, structura, spirito y notanan splicativo. Na Corsou e ley di e Camara di Comercio y e ley di Registro di Comercio, mescos cu Boneiro y Aruba, tin e mesun ADN.

El a agrega cu na 2022 Boneiro a cambia e leynan di Registro di Comercio pa implementa, entre otro cos, tarifa nobo pa e servicio di Registro di Comercio, incluso, acceso via internet pa e recordnan di Registro di Comercio. E ley di e Camara di Comercio di Boneiro no a cambia. Corsou tambe a cambia su ley di Registro di Comercio na 2022 y no e ley di e Camara di Comercio pa cobra acceso via internet pa e recordnan di Registro di Comercio

E abogado ta puntra si e cambionan aki no a ser discuti of comparti cu e Camara di Comercio di Aruba, si no ta den e miho interes di tur e Camaranan pa mantene liñanan di comunicacion habri y discuti asuntonan di interes comun. El a cuestiona si e Camara di Aruba tabata consciente di e cambionan na Boneiro y Corsou of si nan no a worry cu esaki.

El a sigui cuestiona cu si “e firma cu hopi abogado” a expresamente bisa cu e Camara di Aruba no mester sigui e mesun liña legislativo cu Corsou y Boneiro a haci, si e firma aki ta existi of si e opinion legal aki ta existi.

“E comunidad Arubano lo kier haya e derecho pa wak e opinion aki cu nan wowo mes. Mi ta pidi e Camara, den un spirito di transparencia y bon gobernacion, como un institucion publico, pa publica e conseho legal cu nan a haya cu e miembronan di prensa pa nan por evalua e contenido di e opinion y transmiti’e na e pueblo Arubano. Laga e hende dicidi. Por fabor haci publico e conseho cu bo ta asina firmemente convenci di dje y ta pertenece na, prome cu final di dia di trabou diabierna 5 di juli 2024, y laga nos, e comunidad di negoshi, e miembronan di e Camara di Comercio y e comunidad grandi, dicidi pa nos mes. Bo no tin nada pa sconde! Sali for di e sombranan di scuridad,” el a enfatisa.

Por ultimo, abogado Gomez a indica cu e lo desea pa sa kico e minister encarga politicamente cu Camara di Comercio, esta minister Geoffrey Wever, tin di bisa tocante e situacion aki. El señala cu como un ex-abogado, e lo kier haya minister Wever su punto di bista tocante e tema y no solamente bisa cu “gobierno no ta envolvi” pasobra ora cu no respeta ley, gobierno mester envolve su mes.

Siman pasa reportera di Bon Dia Aruba a tuma contacto cu minsister di Economia, Comunicacion y Desaroyo Sostenibel pa puntra si Camara di Comercio por restringi e acceso na e registro comercial online y si nan tin un base legal en berdad pa introduci e sistema di cobransa pa por tin acceso na e registro comercial online. Te ainda no a logra haya contesta di e minister ariba e preguntanan aki.