Abogado pa ex-minister Paul Croes den su caso di apelacion, mr. Desiree Croes, ayera a entrega un solicitud pa scucha casi 100 persona como testigo den e caso di expropiacion di e ex-minister.
Februari ultimno, ex-minister Paul Croes a presenta na KIA pa cuminsa paga su condena penal di 3 aña cu e tin cu husticia di Aruba pa corupcion, labamento di placa, participacion den un organisacion criminal “ontheffingfabriek”, abuso di poder como minister y a usa su fundacion di campaña pa asuntonan personal; entre otro pa paga su debe di estudio y credit card.
Segun un relato den noticiero online, NoticiaCla, abogado Croes a indica cu ta necesario pa scucha por lo menos un gran parti di e casi 100 testigo aki, ya cu nan lo por confirma cu mayoria di e placa cual e ex-minister ta acusa di a malversa a ser ricibi di manera legal, y nan lo tin prueba.
Riba e motibo pakico a tarda pa bin cu e lista di testigo, a indica cu a dura algun tempo pa por haya paradero di tur e personanan en cuestion y confirma cu nan ta dispuesto pa duna nan testimonio. A indica tambe cu for di april na momento cu Corte a pidi pa entrega cualkier informacion adicional cu ta considera necesario, te cu september ultimo, Croes a purba di yega na un areglo di pago pa e suma cu mester expropia, pero corte a keda rechasa esaki, y ta p’esey te awo ta bin cu e lista di testigo.
Segun NoticiaCla, e lista ta componi pa hende cu a duna Croes regalo den forma di placa durante su casamento na 2013, cu sumanan cuantioso. Abogado di e ex-minister ta indica sinembargo cu esaki ta algo cu ta usual na momento di casamento, esta cu ta duna un envelope cu placa como regalo.
Otro fuente di e placa ta bin di carnavalistanan pa ken casa di e ex-minister y su famia tabata traha headpiece pa participantenan di nan grupo. A menciona casi 300 participante cada un pagando al menos 250 florin pa headpiece. Tur e placa aki, segun e abogado, tabata ricibi legalmente y e hendenan riba e lista di testigo por duna prueba di esaki.
E argumento ta cu e personanan aki confirmando e origen di algun di e placa ta trece cambio den e suma cu ta menciona pa expropiacion, haciendo e suma incorecto. Segun e abogado, e suma cu mester expropia lo mester bira mas chikito.
Segun NoticiaCla, Ministerio Publico tabata molesto cu e situacion presenta pa abogado Croes ayera mainta, cual nan a considera como uno incorecto, ya cu desde april a pidi pa duna informacion y ta te awo, seis luna despues, cu ta bin cu un lista cu casi 100 persona pa scucha. OM ta insisti cu ya tin un sentencia dicta cu ta mustra bon cla cu a haya e ex-minister culpable pa e suma en cuestion y e mester paga e suma back. Pues OM no tabata dispuesto pa bay di acuerdo cu e solicitud di e abogado.
Hues ta bay tuma un decision riba e solicitud di e abogado dia 27 di november proximo.
